വാ​ഷിംഗ്ട​ൺ: അമേരിക്കയിൽ കാ​പിറ്റോൾ ബിൽഡിംഗിലെ ചെ​ക്​​പോ​സ്​​റ്റി​ലേ​ക്ക്​ കാ​ർ ഇ​ടി​ച്ചു​ക​യ​റ്റി ആ​ക്ര​മ​ണം നടത്തിയ യുവാവ്​ നേഷൻ ഒഫ്​ ഇസ്​ലാം എന്ന സംഘടനയുടെ അനുയായി ആണെന്ന്​ പൊലീസ്​. നോ​വ ഗ്രീ​ൻ എന്നാണ് ഇയാളുടെ പേര്. ഇയാൾ ഫേസ്​ബുക്കിൽ ഈ സംഘടനയുടെ നേതാക്കളായ ലൂ​യി ഫ​റാ​ഖാ​​ന്റെയും എലൈജ മുഹമ്മദിന്റെയും പ്രഭാഷണങ്ങൾ പോസ്റ്റ് ചെയ്തിട്ടുണ്ട്. താൻ ഫറാ ഖാന്റെ അനുയായി ആണെന്ന്​ നോവ ​ഫേസ്​ബുക്കിൽ രേഖപ്പെടുത്തിയിട്ടുണ്ട്​. കാപ്പിറ്റോളിലെ സെ​ന​റ്റ്​ ഭാ​ഗ​ത്തെ റോ​ഡി​ലെ ബാ​രിക്കേഡിലേ​ക്കാ​ണ്​ നോവ വെള്ളിയാഴ്ച കാ​ർ ഇ​ടി​ച്ചു​ക​യ​റ്റി​യ​ത്. കാ​വ​ൽ നി​ൽ​ക്കു​ക​യാ​യി​രു​ന്ന ര​ണ്ട്​ പൊ​ലീ​സു​ദ്യോ​ഗ​സ്ഥ​ർ​ക്ക്​ പ​രി​ക്കേ​റ്റു. ഗു​രു​ത​ര​മാ​യി പ​രി​ക്കേ​റ്റ വി​ല്യം ഇ​വാ​ൻ​സ്​ പി​ന്നീ​ട്​ ആ​ശു​പ​ത്രി​യി​ൽ മ​രി​ച്ചു. കാ​റി​ൽ​നി​ന്ന്​ പു​റ​ത്തി​റ​ങ്ങി​യ അ​ക്ര​മി ക​ത്തി​യു​മാ​യി പൊ​ലീ​സി​നു​​നേ​രെ പാ​ഞ്ഞ​ടു​ത്തു. തുടർന്ന്, പൊ​ലീ​സ്​ ഇയാൾക്ക് നേരെ വെടിയുതിർത്തു. ഉടൻ തന്നെ ഇയാളെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല