കൗറി: ചെനാബ് നദിക്ക് കുറുകെ നിർമിക്കുന്ന ലോകത്തിലെ ഏറ്റവും ഉയരമുള്ള റെയിൽവേ പാലത്തിന്റെ കമാനത്തിന്റെ നിർമാണം പൂർത്തിയായി. ജമ്മു കാശ്മീരിലെ റിയാസി ജില്ലയിലെ കൗറി ഗ്രാമത്തിലാണ് പാലം നിർമിക്കുന്നത്. രണ്ട് കുന്നുകളെ തമ്മിൽ ബന്ധിപ്പിക്കുന്ന പാലത്തിന് നദീതടത്തിൽനിന്ന് 359 മീറ്ററാണ് ഉയരം.

1.3 കിലോമീറ്റർ നീളമുളള പാലം കാശ്മീർ താഴ്വരയിലേക്കുളള യാത്ര കൂടുതൽ സുഗമമാക്കും. ഉദ്ധംപൂർ-ശ്രീനഗർ-ബരാമുല്ല റെയിൽവേ ലിങ്ക് പദ്ധതിയുടെ ഭാഗമായി 1486 കോടി മുതൽമുടക്കിലാണ് പാലം നിർമിക്കുന്നത്. ഇതിന് പാരിസിലെ ഐഫൽ ഗോപുരത്തേക്കാൾ 30 മീറ്റർ ഉയരം കൂടുതലാണ്. പാലത്തിന്റെ നിർമാണം ഒരു വർഷത്തിനുളളിൽ പൂർത്തിയാകും എന്നാണ് പ്രതീക്ഷിക്കുന്നത്.

കമാനത്തിന്റെ അവസാനഘട്ട നിർമാണ പ്രവൃത്തികൾ കേന്ദ്ര റെയിൽവേ മന്ത്രി പീയൂഷ് ഗോയൽ, റെയിൽവേ ബോർഡ് ചെയർമാനും സി.ഇ.ഒയുമായ സുനീത് ശർമ, നോർത്തേൺ റെയിൽവേ ജനറൽ മാനേജർ അശുതോഷ് ഗംഗലും വീഡിയോ കോൺഫറൻസിലൂടെ വീക്ഷിച്ചു. റെയിൽവേയുടെ ചരിത്രത്തിൽ തന്നെ 2.74 ഡിഗ്രി വളച്ച് പാലത്തിനായി കമാനം നിർമിക്കുന്നത് ആദ്യമായാണ്. പാലത്തിന് 120 വർഷമാണ് റെയിൽവേ കണക്കാക്കുന്ന ആയുസ്.