മസ്കത്ത്: തലസ്ഥാന ഗവർണറേറ്റിലെ മവേല മേഖലയിൽ കെട്ടിടത്തിന് തീപിടിച്ചു. അപ്പാർട്മെന്റുകൾ അടങ്ങിയ കെട്ടിടത്തിനാണ് ശനിയാഴ്ച അർധരാത്രിയോടെ തീപിടിച്ചത്. സിവിൽ ഡിഫൻസ് കെട്ടിടത്തിലുണ്ടായിരുന്നവരെ ഒഴിപ്പിച്ച് തീയണച്ചു. ഹൈഡ്രോളിക് ക്രെയിൻ ഉപയോഗിച്ചാണ് രക്ഷാപ്രവർത്തനം നടത്തിയത്. ആർക്കും പരിക്കില്ലാതെ തീയണക്കാൻ സാധിച്ചതായി സിവിൽ ഡിഫൻസ് അറിയിച്ചു.
ബോഷറിൽ പാർക്കിംഗ് സ്ഥലത്തുണ്ടായ തീപിടിത്തത്തിൽ നിരവധി കാറുകൾ കത്തിനശിച്ചു. ഞായറാഴ്ച ഉച്ചയ്ക്കുശേഷമാണ് സംഭവം. തീപിടിത്തത്തിന്റെ കാരണം വ്യക്തമല്ല. ഒരു വാഹനത്തിൽനിന്ന് പടരുകയായിരുന്നെന്നാണ് നിഗമനം. ആർക്കും പരിക്കില്ല.