മുംബയ് : കൊവിഡിന്റെ രണ്ടാംതരംഗത്തിൽ രാജ്യത്ത് ഇന്ന് പ്രതിദിനരോഗികളുടെ എണ്ണം ഒരുലക്ഷം കടന്നിരുന്നു. മഹാരാഷ്ട്രയിലാണ് കൊവിഡ് വ്യാപനം ഏറ്റവും രൂക്ഷം,​ കൊവിഡ് വ്യാപനം പിടിവിട്ട അവസ്ഥയിൽ 25 വയസിന് മുകളിലുള്ളവർക്ക് കൊവിഡ് പ്രതിരോധ വാക്സിനേഷൻ അനുവദിക്കണമെന്ന് ആവശ്യപ്പെട്ട് മുഖ്യമന്ത്രി ഉദ്ധവ് താക്കറെ പ്രധാനമന്ത്രിക്ക് കത്തയച്ചു..

മഹാമാരി തുടങ്ങിയതിന് ശേഷമുള്ള ഏറ്റവും മോശ അവസ്ഥയിലൂടെയാണ് മഹാരാഷ്ട്ര കടന്നുപോകുന്നത്. കഴിഞ്ഞദിവസം അരലക്ഷത്തിലധികം രോഗികളാണ് പുതുതായി കണ്ടെത്തിയത്. മുംബയിൽ മാത്രം പ്രതിദിന രോഗികളുടെ എണ്ണം പതിനായിരം കടന്നു. ഈ പശ്ചാത്തലത്തിലാണ് വാക്സിനേഷൻ വിപുലമാക്കണമെന്ന് ആവശ്യപ്പെട്ട് ഉദ്ധവ് താക്കറെ പ്രധാനമന്ത്രിക്ക് കത്തയച്ചത്. 45 വയസിന് മുകളിലുള്ളവർക്ക് തന്റെ ആവശ്യം പരിഗണിച്ച് വാക്സിനേഷൻ അനുവദിച്ചതിന് പ്രധാനമന്ത്രി നരേന്ദ്രമോദിയോട് ഉദ്ധവ് താക്കറെ നന്ദി അറിയിച്ചു.