കണ്ണൂർ: സംസ്ഥാനത്ത് എൽ ഡി എഫ് തുടർ ഭരണം ഉറപ്പെന്ന് മന്ത്രി ഇ പി ജയരാജൻ. ഇടതുമുന്നണി കേരളത്തിൽ നൂറിലധികം സീറ്റ് നേടും. കണ്ണൂർ ജില്ലയിലെ പതിനൊന്ന് സീറ്റും സ്വന്തമാക്കും. ക്യാപ്‌റ്റൻ എന്നാൽ നേതാവ്, നയിക്കുന്നയാൾ എന്നേ അർത്ഥമുളളൂ, അതിനെ വിവാദമാക്കേണ്ട ആവശ്യമില്ലയെന്നും ഇ പി ജയരാജൻ പറഞ്ഞു.

എൽ ഡി എഫ് വമ്പിച്ച വിജയം നേടുമെന്ന് മന്ത്രി ഇ ചന്ദ്രശേഖരനും പ്രതികരിച്ചു. മഞ്ചേശ്വരത്ത് ആര് ജയിക്കുമെന്ന് പറയാനാകില്ല. അവിടെ ശക്തമായ മത്സരമാണ് നടക്കുന്നത്. ബി ജെ പി വരില്ലെന്നാണ് പ്രതീക്ഷയെന്നും ഇ ചന്ദ്രശേഖരൻ വ്യക്തമാക്കി.

തൃശൂർ ജില്ലയിൽ 13 സീറ്റും എൽ ഡി എഫ് നേടുമെന്ന് എ സി മൊയ്‌തീൻ പറഞ്ഞു. വടക്കാഞ്ചേരിയിൽ ഇടതുപക്ഷം ജയിക്കും. അനിൽ അക്കര വിവാദം ഉണ്ടാക്കിയാണ് പ്രചാരണം നടത്തുന്നത്. ഈ ജൽപ്പനങ്ങൾ വിലപോവില്ല. ഇത്തവണയും കഴിഞ്ഞ തവണയും കൃത്യസമയത്താണ് വോട്ട് ചെയ്‌തതെന്നും അദ്ദേഹം പറഞ്ഞു.