കൊല്ലം: മന്ത്രി മേഴ്‌സികുട്ടിയമ്മക്കെതിരെ യു.ഡി.എഫ് സ്ഥാനാര്‍ത്ഥി പി.സി വിഷ്ണുനാഥ്. ഇഎംസിസി ഡയറക്ടറും കുണ്ടറ മണ്ഡലത്തിലെ സ്വതന്ത്ര സ്ഥാനാര്‍ത്ഥിയുമായ ഷിജു വര്‍ഗീസിനെക്കുറിച്ച് മന്ത്രി നടത്തിയത് തെറ്റിദ്ധരിപ്പിക്കുന്ന പ്രസ്താവനയാണെന്ന് വിഷ്ണുനാഥ് കുറ്റപ്പെടുത്തി. വോട്ടര്‍മാരെ സ്വാധീനിക്കാനുള്ള ശ്രമമാണ് മന്ത്രിയുടെ ഭാഗത്ത് നിന്നുണ്ടായത്. ഉത്തരവാദിത്തപ്പെട്ട സ്ഥാനത്തിരിക്കുന്ന മന്ത്രി ഇത്തരം പ്രസ്താവനകള്‍ നടത്താന്‍ പാടില്ലെന്നും അദ്ദേഹം പറഞ്ഞു. ഷിജു വര്‍ഗീസിന്റെ കാര്‍ ആരെങ്കിലും കത്തിക്കാന്‍ ശ്രമിച്ചതാണോ അതോ കത്തിക്കാന്‍ അയാള്‍ ആളെ ഏര്‍പ്പാടാക്കിയതാണോ എന്ന് പൊലീസ് അന്വേഷിച്ച് കണ്ടുപിടിക്കേണ്ട സംഭവമാണ്. അന്വേഷണം നടക്കാനിരിക്കെ മന്ത്രിയുടെ ഭാഗത്തുനിന്നുണ്ടായത് തിരഞ്ഞെടുപ്പ് ചട്ടലംഘനമാണെന്നും വിഷ്ണുനാഥ് കൂട്ടിച്ചേര്‍ത്തു.
തിരഞ്ഞെടുപ്പ് അട്ടിമറിക്കാനായി ഷിജു വര്‍ഗീസ് ഗൂഢാലോചന നടത്തിയെന്നും ആക്രമിക്കപ്പെട്ടുവെന്ന് വരുത്തിത്തീര്‍ക്കാന്‍ ശ്രമിച്ചുവെന്നും മന്ത്രി മേഴ്സിക്കുട്ടിയമ്മയാണ് മാദ്ധ്യമങ്ങളോട് വെളിപ്പെടുത്തിയിരുന്നു. ഷിജു വര്‍ഗീസ് പെട്രോള്‍ കൊണ്ടുവന്ന് കാര്‍ കത്തിക്കാന്‍ ശ്രമിച്ചു. തുടര്‍ന്ന് നടത്തിയ പരിശോധനയില്‍ ഇദ്ദേഹത്തിന്റെ കാറില്‍ നിന്ന് പെട്രോള്‍ നിറച്ച കുപ്പി കണ്ടെടുത്തെന്നും ഇയാള്‍ പൊലീസ് കസ്റ്റഡിയിലാണെന്നുമാണ് മന്ത്രി മാദ്ധ്യമങ്ങളോട് പറഞ്ഞത്. എന്നാല്‍ ഷിജു വര്‍ഗീസ് പരാതിക്കാരനാണെന്നും ഇദ്ദേഹത്തിന്റെ കാറില്‍ നിന്ന് പെട്രോള്‍ കണ്ടെടുത്തില്ലെന്നും പൊലീസ് വ്യക്തമാക്കിയിരുന്നു.