പെരുമ്പാവൂർ: പെരുമ്പാവൂർ നിയോജകമണ്ഡലം എൻ.ഡി.എ സ്ഥാനാർത്ഥി അഡ്വ.ടി.പി. സിന്ധുമോൾ സഞ്ചരിച്ചിരുന്ന വാഹനത്തിനുനേരെ കല്ലേറ് നടത്തിയതായി പരാതി. തുരുത്തിപ്ലിയിൽ നിന്ന് രായമംഗലത്തിന് പോകുന്നതിനിടെ തിങ്കളാഴ്ച രാത്രി പത്തോടെ അല്ലപ്ര കൊയ്‌നോണിയക്ക് സമീപത്തായിരുന്നു ആക്രമണം നടന്നത്. അപ്രതീക്ഷിത ആക്രമണത്തെത്തുടർന്ന് ബോധക്ഷയമുണ്ടായ സ്ഥാനാർത്ഥിയെ സ്വകാര്യ ആശുപത്രിയിൽ പ്രവേശിപ്പിച്ചു. സിന്ധുമോൾ സഞ്ചരിച്ചിരുന്ന വാഹനത്തെ പിന്തുടർന്ന് കാറിൽവന്ന അക്രമികൾ കല്ലെറിയുകയായിരുന്നുവെന്ന് ബി.ജെ.പി നേതാക്കൾ പറഞ്ഞു. പെരുമ്പാവൂർ പൊലീസ് കേസെടുത്ത് അന്വേഷണം ആരംഭിച്ചു.