കൊച്ചി: ഓൺലൈൻ മാദ്ധ്യമങ്ങളിലൂടെ തന്നെ അപമാനിച്ചുവെന്നാരോപിച്ച് മാദ്ധ്യമപ്രവർത്തകൻ 'ക്രൈം' നന്ദകുമാറിനെതിരെ പരാതിയുമായി ബിജെപി നേതാവും കഴക്കൂട്ടത്തെ പാർട്ടിയുടെ സ്ഥാനാർത്ഥിയുമായ ശോഭാ സുരേന്ദ്രൻ.

മാദ്ധ്യമപ്രവർത്തകനെതിരെ ദേശീയ വനിതാ കമ്മീഷനെ സമീപിക്കുകയാണ് ശോഭ ചെയ്തിരിക്കുന്നത്. നന്ദകുമാറിന് പുറമെ കോട്ടയം പാലാ സ്വദേശി അജിത് കുമാറിനെതിരെയും ശോഭ ദേശീയ വനിതാ കമ്മീഷന് പരാതി നൽകിയിട്ടുണ്ട്.

വ്യാജരേഖകൾ ചമച്ച് തന്നെ വ്യക്തിപരമായി അപകീർത്തിപ്പെടുത്തുകയും സ്ത്രീത്വത്തെ അവഹേളിക്കുന്ന നുണകൾ ഓൺലൈൻ മാദ്ധ്യമങ്ങളിലൂടെ പ്രചരിപ്പിക്കുകയും ചെയ്തുവെന്നാണ് ശോഭാ സുരേന്ദ്രൻ തന്റെ പരാതിയുടെ ആരോപിക്കുന്നത്.

നിക്ഷിപ്ത താൽപര്യങ്ങൾക്കനുസരിച്ച് നന്ദകുമാറും അജിത്തും ഗൂഢാലോചന നടത്തിയെന്ന് വ്യക്തമായ വിവരമുണ്ടെന്ന് ബിജെപി നേതാവ് പറയുന്നുണ്ട്. ഇതിന്റെ തെളിവുകളും പരാതിക്കൊപ്പം നൽകി.

ക്രിമിനൽ ഗൂഢാലോചനയ്ക്കും വ്യക്തിഹത്യയ്ക്കും വ്യാജ രേഖ ചമയ്ക്കലിനും എതിരെ കൂടുതൽ നിയമ നടപടികൾ സ്വീകരിക്കാനും ശോഭ തീരുമാനിച്ചിട്ടുണ്ട്. പൊതുപ്രവർത്തകരും അല്ലാത്തവരുമായ ഇത്തരത്തിൽ ആക്രമണത്തിന് ഇരയാകേണ്ടി വരുന്ന മുഴുവൻ സ്ത്രീകൾക്കും വേണ്ടിയുള്ള ഇടപെടലും പോരാട്ടവുമാണിതെന്ന് ശോഭ സുരേന്ദ്രൻ പറഞ്ഞു.

Content Highlight: Shobha Surendran approches womens commision against crime nandakumar.