ന്യൂഡൽഹി: രാജ്യത്ത് പ്രതിദിന കൊവിഡ് ബാധിതരുടെ എണ്ണം രണ്ട് ലക്ഷം കടന്നു. കഴിഞ്ഞ 24 മണിക്കൂറിനിടെ 2,00,739 ലക്ഷം പേർക്കാണ് രോഗബാധ സ്ഥിരീകരിച്ചത്. ഇന്നലെ മാത്രം 1038 പേർ രാജ്യത്ത് മരണമടഞ്ഞു. രാജ്യത്ത് ഇതുവരെ ഉണ്ടായിട്ടുളളതിൽ ഏറ്റവും ഉയർന്ന പ്രതിദിന വർദ്ധനയാണിത്.

പ്രതിദിന രോഗികളുടെ എണ്ണം ഒരു ലക്ഷത്തിൽ നിന്നും രണ്ടു ലക്ഷത്തിലേക്ക് എത്താനെടുത്തത് പത്തു ദിവസമാണ്. പ്രതിദിന രോഗികളുടെ എണ്ണത്തിൽ അമേരിക്ക മാത്രമാണ് ഇന്ത്യയ്‌ക്ക് മുമ്പ് രണ്ടു ലക്ഷം കടന്ന ഏക രാജ്യം. ഏപ്രിൽ നാലിനാണ് രാജ്യത്ത് ആദ്യമായി കൊവിഡ് രോഗികളുടെ എണ്ണം ഒരു ലക്ഷം എത്തിയത്. ഏപ്രിൽ പത്തിന് പ്രതിദിന കൊവിഡ് രോഗികൾ ഒന്നര ലക്ഷമായി ഉയർന്നു.

കഴിഞ്ഞ മാർച്ച് ഒന്നിന് പ്രതിദിന രോഗികൾ വെറും 12,271 ആയിരുന്നു. അവിടെ നിന്നാണ് രോഗവ്യാപനത്തിൽ വൻ കുതിപ്പ് ഉണ്ടായിരിക്കുന്നത്. നിലവിൽ ചികിത്സയിൽ ഉളളവരുടെ എണ്ണം 14 ലക്ഷത്തിനോട് അടുക്കുകയാണ്. പ്രതിദിന മരണ നിരക്ക് തുടർച്ചയായ രണ്ടാം ദിവസമാണ് ആയിരം കടക്കുന്നത്.