വടക്കാഞ്ചേരി: കുടുംബവഴക്കിനെ തുടർന്ന് ദേശമംഗലത്ത് കണ്ണിന് കാഴ്ചയില്ലാത്ത പിതാവിനെ മകൻ വെട്ടിക്കൊന്നു. ദേശമംഗലം തലശ്ശേരി ശൈര്യം പറമ്പിൽ മുഹമ്മദിനെയാണ് (77) മകൻ ജമാൽ (31) വെട്ടിക്കൊന്നത്. വീട്ടിൽ ഇവർ രണ്ടുപേരും മാത്രമാണ് താമസം. വഴക്കിനെ തുടർന്ന് വെട്ടുകത്തികൊണ്ട് കഴുത്തിൽ വെട്ടുകയായിരുന്നു. കഴുത്തിൽ ആറ് മുറിപ്പാടുകളുണ്ട്. സംഭവത്തിന് ശേഷം വീട്ടിൽ നിന്ന് പുറത്തുപോയ ജമാൽ അയൽവാസിയായ ഇബ്രാഹിമിനെ വിളിച്ച് വിവരം അറിയിക്കുകയായിരുന്നു. ഇബ്രാഹിം മുഹമ്മദിന്റെ വീട്ടിലെത്തിയപ്പോഴേക്കും മുഹമ്മദ് ചോരയിൽക്കുളിച്ച് മരിച്ചുകിടക്കുന്നതാണ് കണ്ടത്. വിവരം അറിയിച്ചതിനെ തുടർന്ന് പൊലീസ് സ്ഥലത്തെത്തി നടപടികൾ ആരംഭിച്ചു. ജമാലിനെ പൊലീസ് അറസ്റ്റ് ചെയ്തിട്ടുണ്ട്.