ന്യൂഡൽഹി: രാജ്യത്ത് കൊവിഡ് വ്യാപനം രൂക്ഷമാകുന്ന പശ്ചാത്തലത്തിൽ കൊവാക്സിൻ ഉത്‌പാദനം രണ്ട് മാസത്തിനുള്ളിൽ ഇരട്ടിയായി വർദ്ധിപ്പിക്കുമെന്ന് കേന്ദ്രസർക്കാർ അറിയിച്ചു. മേയ് - ജൂൺ മാസം കൊണ്ട് ഉത്‌പാദനം ഇരട്ടിയാക്കും. ജൂലായ് - ആഗസ്റ്റ് മാസത്തിനുള്ളിൽ 6.7 മടങ്ങ് വരെ ഉത്‌പാദനം വർദ്ധിപ്പിക്കലാണ് ലക്ഷ്യം.

വാക്സിൻ നിർമാതാക്കൾക്ക് കേന്ദ്രസർക്കാർ സാമ്പത്തിക സഹായമുൾപ്പെടെ ഉറപ്പുവരുത്തും.

ഏപ്രിൽ- മെയ് മാസങ്ങളിൽ ഒരു കോടി ഡോസ് വാക്സിൻ ഉത്പാദിപ്പിക്കാനാണ് ലക്ഷ്യം .സെപ്തംബർ മാസത്തോടെ പ്രതിമാസം 10 കോടി ഡോസ് വാക്സിനാവും ഉത്പാദിപ്പിക്കുക.

ഭാരത് ബയോടെക്കിന്റെ ബാംഗ്ലൂരിലെ സ്ഥാപനം, മുംബയിലെ ഹാഫ്കിൻ ബയോഫാർമസ്യൂട്ടിക്കൽ കോർപ്പറേഷൻ, ഹൈദരാബാദിലെ ഇന്ത്യൻ ഇമ്മ്യൂണോളജിക്കൽസ് ലിമിറ്റഡ് എന്നിവയാവും വാക്സിൻ ഉത്പാദനം നടത്തുന്നത്. ഭാരത് ബയോടെക്, ഹാഫ്കിൻ ബയോഫാർമസ്യൂട്ടിക്കൽസ് എന്നിവയ്ക്ക് 65 കോടി വീതവും സാമ്പത്തിക സഹായവമായി സർക്കാർ കൈമാറും. പ്രതിമാസം 2 കോടി ഡോസ് വാക്സിൻ ആണ് ഈ നിർമാതാക്കളുടെ ഉത്പാദന ക്ഷമത. 1.5 കോടി വരെയാണ് ഇന്ത്യൻ ഇമ്മ്യൂണോളജിക്കൽസ് ലിമിറ്റഡിന്റെ പ്രതിമാസ ഉത്പാദന ക്ഷമത.