ലണ്ടൻ: വളർത്തുനായ ഭക്ഷണത്തിനൊപ്പം വിഴുങ്ങിയത് ആപ്പിളിന്റെ ഇയർപോഡ്. ഇയർപോഡ് പുറത്തെടുക്കാന അവസാനം ശസ്ത്രക്രിയ തന്നെ വേണ്ടി വന്നു. റെയ്​ച്ചൽ ഹിക്ക്​ എന്ന 22 കാരിയുടെ പ്രിയങ്കരനായ വളർത്തുനായ്​ ജിമ്മിയാണ്​ അബദ്ധത്തിൽ ഇയർപോഡ്​ വിഴുങ്ങിയത്​. ചാർജിങ്​ കെയ്​സ്​ അടക്കമാണ്​ ജിമ്മി വയറ്റിനകത്താക്കിയത്​. ലണ്ടനിലെ ഹള്ളിൽ കഴിഞ്ഞ ഈസ്റ്റർ ദിനത്തിലായിരുന്നു​ സംഭവം.നായ്​ക്കുട്ടിക്ക്​ ഭക്ഷണം നൽകുന്നതിനിടെ അബദ്ധത്തിൽ പോക്കറ്റിൽ നിന്ന്​ ഇയർപോഡ്​ തറയിൽ വീഴുകയും നിമിഷങ്ങൾക്കം സമീപത്തുണ്ടായിരുന്ന ജിമ്മി ഇയർപോഡ്​ വിഴുങ്ങുകയും ചെയ്തു.ഇത് കണ്ട് പരിഭ്രമിച്ച റെയ്​ച്ചൽ നായ്ക്കുട്ടിയെ അടുത്തുള്ള മൃഗാശുപത്രിയിലെത്തിക്കുകയായിരുന്നു.

ശസ്​ത്രക്രിയ നടത്തി ഇയർപോഡ്​ പുറത്തെടുക്കുക മാത്രമാണ്​ പോംവഴിയെന്നായിരുന്നു ഡോക്​ടറുടെ മറുപടി. എക്​സ്​റേയിൽ നായുടെ വയറ്റിൽ ഇയർപോഡ്​ കണ്ടെത്തുകയും ചെയ്​തു. ബാറ്ററി ആസിഡ്​ ശരീരത്തിലെത്തിയാൽ ആരോഗ്യപ്രശ്​നങ്ങളുണ്ടാകുമെന്ന്​ ചൂണ്ടിക്കാട്ടിയതോടെ റെയ്​ച്ചൽ ശസ്​ത്രക്രിയക്ക്​ സമ്മതിക്കുകയായിരുന്നു. തുടർന്ന്​ ശസ്​ത്രക്രിയ നടത്തി ജിമ്മിയുടെ വയറ്റിൽനിന്ന്​ ഇയർപോഡ്​ എടുത്തു. ജിമ്മി വിഴുങ്ങിയിട്ടും ഇയർപോഡിന്​ കാര്യമായ കേടുപാടുകളൊന്നും പറ്റിയില്ലെന്നതാണ് മറ്റൊരു അത്ഭുതം.