വാഷിംഗ്ടൺ: കൊവിഡ് വ്യാപനം രൂക്ഷമായ ഇന്ത്യയ്ക്ക് സഹായവുമായി അമേരിക്ക. അഞ്ചു ടൺ ഓക്‌സിജൻ കോൺസൻട്രേറ്റ് ഇന്ത്യയ്ക്ക് കൈമാറി. 300 ഉപകരണങ്ങളുമായി എയർ ഇന്ത്യ വിമാനം ന്യൂയോർക്കിൽ നിന്ന് പുറപ്പെട്ടു. ഇന്ത്യയെ സഹായിക്കാൻ പ്രതിജ്ഞാബദ്ധമാണെന്ന് യു എസ് പ്രസിഡന്റ് ജോ ബൈഡൻ പറഞ്ഞു.

പ്രതിസന്ധി ഘട്ടത്തിൽ അമേരിക്കയ്ക്ക് ഇന്ത്യ നൽകിയ സഹായം മറക്കില്ലെന്നും,അതിഭീകരമായ സാഹചര്യത്തിലൂടെ കടന്നുപോകുന്ന ഇന്ത്യയ്ക്ക് സഹായം ഉറപ്പാക്കുമെന്നും ബൈഡൻ ട്വീറ്റ് ചെയ്തു. വാക്‌സിൻ ഉൽപ്പാദനത്തിനായി ഉപയോഗിക്കുന്ന അസംസ്‌കൃത വസ്തുക്കൾ ഇന്ത്യയ്ക്ക് നൽകുമെന്ന് യുഎസ് ദേശീയ സുരക്ഷ ഉപദേഷ്ടാവ് ജെയ്ക് സുള്ളിവൻ നേരത്തെ അറിയിച്ചിരുന്നു.

ഇന്ത്യയ്ക്ക് സഹായമെത്തിക്കാൻ സർക്കാരുമായി ചേർന്ന് പ്രവർത്തിക്കുമെന്ന് യു എസ് വൈസ് പ്രസിഡന്റ് കമല ഹാരിസ് ട്വീറ്റ് ചെയ്തു. ഇന്ത്യാ ഗവൺമെന്റുമായി നിരന്തരം സംസാരിക്കുന്നുണ്ടെന്നും, ആവശ്യമായ സഹായങ്ങൾ ഉടൻ എത്തിക്കുമെന്നും അവർ അറിയിച്ചു. ആരോഗ്യപ്രവർത്തകരടക്കമുള്ള ജനങ്ങൾക്കായി പ്രാർത്ഥിക്കുന്നുവെന്നും കമല ഹാരിസ് ട്വീറ്റ് ചെയ്തു.