മലപ്പുറം : നിയമസഭ, മലപ്പുറം ലോക്സഭ ഉപതിരഞ്ഞെടുപ്പിനുള്ള ഒരുക്കങ്ങൾ ജില്ലയിൽ പൂർത്തിയായി. വോട്ടെടുപ്പ് നാളെ രാവിലെ ഏഴ് മുതൽ രാത്രി ഏഴ് വരെയാണ്. ഇതിൽ വൈകിട്ട് ആറ് മുതൽ ഏഴ് വരെ കൊവിഡ് രോഗികൾക്ക് വോട്ട് ചെയ്യാനുള്ള അവസരമാണ്. ഏറനാട്, നിലമ്പൂർ, വണ്ടൂർ(എസ്.സി) എന്നീ നിയോജകമണ്ഡലങ്ങളിലെ വോട്ടിംഗ് സമയം രാവിലെ ഏഴ് മുതൽ വൈകിട്ട് ആറ് വരെയായിരിക്കും.

• 16 നിയമസഭാ മണ്ഡലങ്ങളിലേക്ക് 111 സ്ഥാനാർത്ഥികളും മലപ്പുറം ലോക്സഭ മണ്ഡലം ഉപതിരഞ്ഞെടുപ്പിൽ ആറ് സ്ഥാനാർത്ഥികളുമാണ് ജനവിധി തേടുന്നത്.
• ആബ്‌സെന്റീ വേട്ടേഴ്സ് വിഭാഗത്തിന്റെ തപാൽ വോട്ടിംഗ് പൂർത്തിയായി. 96.17 ശതമാനം പോളിംഗ് രേഖപ്പെടുത്തി.
• അവശ്യ സർവീസിൽ ഉൾപ്പെട്ടവരിൽ 1,198 പേരിൽ 1090 പേർ വോട്ട് ചെയ്തു
• 33,21,038 വോട്ടർമാരാണ് ജില്ലയിലുള്ളത്.
• 2016 നിയമസഭാ തിരഞ്ഞെടുപ്പിലെ പോളിംഗ് 75.83 ശതമാനം
• 2,753 പോളിംഗ്സ്റ്റേഷനുകളും 2,122 ഓക്സിലറി പോളിംഗ് സ്റ്റേഷനുകളുമുൾപ്പടെ 4,875 പോളിംഗ് സ്റ്റേഷനുകളാണ് ജില്ലയിലുള്ളത്.
• ജില്ലയിൽ 76 ഇടങ്ങളിലായി 194 ക്രിട്ടിക്കൽ ബൂത്തുകളും 38 ഇടങ്ങളിലായി 105 തീവ്രവാദ ഭീഷണിയുള്ള ബൂത്തുകളും രണ്ടിടങ്ങളിലായി ഒമ്പത് വൾനറബിൾ ബൂത്തുകളുമാണുള്ളത്. ഇവിടങ്ങളിൽ കേന്ദ്രസായുധ സേനയുടെ സാന്നിദ്ധ്യമുണ്ടാകും. 2100 ബൂത്തുകളിൽ ലൈവ് വെബ്കാസ്റ്റിങ് സംവിധാനമുണ്ടാകും. 86 ബൂത്തുകളിൽ മുഴുവൻ സമയ വീഡിയോ റെക്കോർഡിംഗും ഉണ്ടാകും.
• ബൂത്തുകളിൽ കോവിഡ് പ്രേട്ടേകോൾ പാലിക്കുന്നുണ്ടെന്ന് ഉറപ്പുവരുത്താൻ ഒരോ ബൂത്തിലേക്കും കോവിഡ് പ്രേട്ടോക്കോൾ ഓഫീസറെ നിയമിച്ചിട്ടുണ്ട്.
• ജില്ലയിൽ സുരക്ഷാ ക്രമീകരണത്തിന് വിന്യസിച്ചത് 3483 പൊലീസ് ഉദ്യോഗസ്ഥരെയാണ്. പോളിംഗ് ബൂത്തുകളിലെ സേവനങ്ങൾക്കായി 3267 സ്‌പെഷ്യൽ പൊലീസ് ഓഫീസർമാരെയും നിയോഗിച്ചിട്ടുണ്ട്.