പാലക്കാട്: പാലക്കാട്ടെ എൻ.ഡി.എ സ്ഥാനാർത്ഥി മെട്രോമാൻ ഇ.ശ്രീധരന് തിരഞ്ഞെടുപ്പിൽ വിജയാശംസകൾ നേർന്ന് ചലച്ചിത്രതാരം മോഹൻലാൽ. ഭാരതത്തിന്റെ അഭിമാനമാണ് ഇ.ശ്രീധരനെന്നും അദ്ദേഹത്തിന്റെ സേവനം നാടിന് ആവശ്യമാണെന്നും മോഹൻലാൽ സമൂഹമാദ്ധ്യമത്തിൽ പങ്കുവച്ച ആശംസാ വീഡിയോയിൽ പറഞ്ഞു. നേരത്തെ കെ.ബി.ഗണേഷ്‌കുമാറിനും ഷിബു ബേബി ജോണിനും മോഹൻലാൽ വിജയായാംശകൾ നേർന്നിരുന്നു.

മോഹൻലാലിന്റെ വാക്കുകൾ: ഓരോ ഭാരതീയനും അഭിമാനിക്കാൻ നമുക്കൊരു വ്യക്തിത്വമുണ്ട്, ഇ.ശ്രീധരൻ. കൊടുങ്കാറ്റിൽ തകർന്ന പാമ്പൻ പാലം 46 ദിവസംകൊണ്ട് പുനർനിർമ്മിച്ച ഇച്ഛാശക്തിയുടെ ഉടമ, അസാധ്യമെന്ന് കരുതിയ കൊങ്കൺ റെയിൽവേ കരിങ്കൽ തുരങ്കങ്ങളിലൂടെ യാഥാർത്ഥ്യമാക്കിയ ധിഷണാശാലി. ഡൽഹി, കൊച്ചി നഗരങ്ങളിലെ മെട്രോ നിർമ്മാണത്തിന് നേതൃത്വം കൊടുത്ത ധീരനായ രാഷ്ട്ര ശില്പി. ഏൽപ്പിച്ച ജോലി സമയത്തിന് മുമ്പേ പൂർത്തിയാക്കി ബാക്കി തുക സർക്കാരിനെ ഏൽപ്പിക്കുന്ന കറ കളഞ്ഞ വ്യക്തിത്വം, ഭാരതം പദ്മവിഭൂഷൺ നൽകി ആദരിച്ച നമ്മുടെ സ്വന്തം മെട്രോമാൻ . വികസനത്തിന്റെ പുതിയ പാതകളിലൂടെ നമ്മളെ നയിക്കാൻ ശ്രീധരൻ സാറിന്റെ സേവനം നമുക്കിനിയും ആവശ്യമുണ്ട്. എന്റെ എല്ലാവിധ വിജയാംശംസകളും.