പത്തനംതിട്ട: നിയമസഭാ തിരഞ്ഞെടുപ്പിൽ വോട്ട് രേഖപ്പെടുത്തിയ ജില്ലയിലെ വോട്ടിംഗ് മെഷീനുകൾ സ്‌ട്രോംഗ് റൂമുകളിൽ ത്രിതല സുരക്ഷയിൽ. മേയ് രണ്ടിന് വോട്ടെണ്ണൽ ദിനം വരെ വോട്ടിംഗ് മെഷീനുകൾ സ്‌ട്രോംഗ് റൂമുകളിൽ കർശന സുരക്ഷയിലാണു സൂക്ഷിക്കുന്നത്.
അഞ്ച് നിയമസഭാ മണ്ഡലങ്ങളിലെയും വോട്ടിംഗ് മെഷീനുകൾ സൂക്ഷിക്കുന്ന സ്‌ട്രോംഗ് റൂമുകൾ 24 മണിക്കൂറും സുരക്ഷാ ഉദ്യോഗസ്ഥരുടെയും സി.സി.ടി.വി സംവിധാനത്തിന്റെയും നിരീക്ഷണത്തിലാണ്. നിയോജക മണ്ഡല അടിസ്ഥാനത്തിലുള്ള സ്‌ട്രോംഗ് റൂമുകളുടെ മേൽനോട്ടത്തിന് എക്‌സിക്യൂട്ടീവ് മജിസ്‌ട്രേറ്റിന്റെ സാന്നിദ്ധ്യമുണ്ട്. ത്രിതല സുരക്ഷാ ക്രമീകരണമാണ് ഏർപ്പെടുത്തിയിട്ടുള്ളത്. സ്‌ട്രോംഗ് റൂമുകളുടെ പുറത്തെ ചുമതല 20 പേരടങ്ങിയ സായുധരായ കേന്ദ്ര പൊലീസിനാണ്. ഈ സുരക്ഷാ കവചത്തിനു പുറത്തെ രണ്ടു തലങ്ങളുടെ സുരക്ഷാ ചുമതല സായുധരായ സംസ്ഥാന പൊലീസിനാണ്.
നിയോജക മണ്ഡലം, സ്‌ട്രോംഗ് റൂമുകൾ ക്രമീകരിച്ചിരിക്കുന്ന സ്ഥലങ്ങൾ എന്ന ക്രമത്തിൽ: തിരുവല്ല: കുറ്റപ്പുഴ മാർത്തോമ റസിഡൻഷ്യൽ സ്‌കൂൾ. റാന്നി: റാന്നി സെന്റ് തോമസ് കോളജ്. ആറന്മുള: കുമ്പഴ മൗണ്ട് ബഥനി പബ്ലിക്ക് സ്‌കൂൾ ( സി.ബി.എസ്.സി). കോന്നി: മലയാലപ്പുഴ മുസലിയാർ കോളജ് ഒഫ് എൻജിനീയറിംഗ് ആൻഡ് ടെക്‌നോളജി. അടൂർ: മണക്കാല തപോവൻ പബ്ലിക്ക് സ്‌കൂൾ.