കടയ്ക്കൽ: നിലമേൽ - മടത്തറ റോഡിൽ ദർപ്പക്കാട്ടിൽ കാറും ബൈക്കും കൂട്ടിയിടിച്ച് ബൈക്ക് യാത്രക്കാരായ യുവാക്കൾ മരിച്ചു. ദർപ്പക്കാട് അംബേദ്കർ ഗ്രാമം നസീമാ മൻസിലിൽ സീനത്തിന്റെ മകൻ അബ്ദുള്ള (22), പാങ്ങലുകാട് അഴകത്തുവിള വീട്ടിൽ ഹരിലാൽ - അജിതകുമാരി ദമ്പതികളുടെ മകൻ അരുൺലാൽ (20) എന്നിവരാണ് മരിച്ചത്.

ഇന്നലെ വൈകിട്ട് നാലോടെയായിരുന്നു അപകടം. കടയ്ക്കലിൽ നിന്ന് ചിതറ ഭാഗത്തേക്ക് പോവുകയായിരുന്ന ബൈക്കിൽ എതിരെ മറ്റൊരു വാഹനത്തെ മറികടന്നെത്തിയ കാർ ഇടിക്കുകയായിരുന്നു. ഗുരുതരമായി പരിക്കേറ്റ ഇരുവരെയും കടയ്ക്കൽ താലൂക്ക് ആശുപത്രിയിൽ എത്തിച്ച് പ്രാഥമിക ശുശ്രൂഷകൾ നൽകിയ ശേഷം തിരുവനന്തപുരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല.

കാറിലുണ്ടായിരുന്ന പാലക്കാട് പുതുപരിയാരം പടിഞ്ഞാറ്റതിൽ തോന്നൂർ ഹൗസിൽ പ്രവീൺ (44), ഭാര്യ സരിത (35) എന്നിവരെ പരിക്കുകളോടെ കടയ്ക്കൽ താലൂക്ക് ആശുപത്രിയിൽ പ്രവേശിപ്പിച്ചു. പൊന്മുടി യാത്ര കഴിഞ്ഞ് പാലക്കാട്ടേക്ക് മടങ്ങുകയായിരുന്നു ദമ്പതികൾ. മരിച്ച അബ്ദുള്ളയുടെ സഹോദരി ആമിന. അരുൺ ലാലിന്റെ സഹോദരൻ: റോഹൻ ലാൽ.