ശാസ്താംകോട്ട: റെയിൽവേ ട്രാക്ക് മുറിച്ചുകടക്കുന്നതിനിടെ ട്രെയിൻ തട്ടി യുവാവ് മരിച്ചു. മറ്റൊരാൾക്ക് പരിക്കേറ്റു. വേങ്ങ വലിയമാടത്തിൽ (കുറ്റിയിൽ അയ്യത്ത്) ഗോപിയുടെ മകൻ രാജീവാണ് (36) മരിച്ചത്. പരിക്കേറ്റ വേങ്ങ തെങ്ങിനഴികത്ത് (രാഖി ഭവനത്തിൽ) രാധാകൃഷ്ണപിള്ളയെ (44) ഗുരുതര പരിക്കുകളോടെ ആലപ്പുഴ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.
ഇന്നലെ രാത്രി 8.30 ഓടെ വേങ്ങ കരാൽ റെയിൽവേ ഗേറ്റിന് സമീപമാണ് അപകടം. ഈ സമയം ഇതുവഴി കടന്നുപോയ രാജധാനി എക്സ്‌പ്രസാണ് തട്ടിയതെന്ന് കരുതുന്നു. പരിക്കേറ്റ രാധാകൃഷ്ണപിള്ള ഗേറ്റിന് സമീപമെത്തി കടകളിൽ നിന്നവരോട് വിവരം പറഞ്ഞപ്പോഴാണ് അപകടവിവരം അറിയുന്നത്. ശാസ്താംകോട്ട പൊലീസ് രാജീവിന്റെ മൃതദേഹം ശാസ്താംകോട്ട താലൂക്ക് ആശുപത്രി മോർച്ചറിയിലേക്ക് മാറ്റി. രാജീവിന്റെ ഭാര്യ: സുനിത. മക്കൾ: അക്ഷര, അദ്വൈത.