പത്തനാപുരം: കേരളത്തിലെ രണ്ടാമത്തേതും തെക്കൻ കേരളത്തിലെ ഏറ്റവും വലുതുമായ നന്ദികേശ രൂപം പത്തനാപുരം കുന്നിക്കോട് കടുമംഗലം ശ്രീമഹാദേവ ക്ഷേത്രത്തിൽ നിർമ്മാണം പുരോഗമിക്കുന്നു.

കേരള പൊലീസ് ജീവനക്കാരനും പ്രശസ്ത ചിത്രകാരനുമായ ബിജു ചക്കുവരയ്ക്കലാണ് നന്ദികേശന്റെ ശിൽപി. കമ്പി ഉപയോഗിക്കാതെ പൂർണമായും ഇഷ്ടികയും സിമന്റും കൊണ്ട് നിർമ്മിച്ചിരിക്കുന്നു എന്ന പ്രത്യേകതയുമുണ്ട്. കൂടാതെ അർത്ഥവൃത്താകൃതിയിലുളള ശിൽപം ഇന്ത്യയിൽ തന്നെ അപൂർവമാണ്.

ഈമാസം 25 ന് നന്ദികേശനെ ക്ഷേത്രത്തിന് സമർപ്പിക്കും
ക്ഷേത്ര പരിസരത്ത് എവിടെ നിന്നു നോക്കിയാലും നന്ദികേശന്റെ കണ്ണും കാതും കാണാൻ കഴിയും. നൂറ്റാണ്ടുകൾക്ക് മുൻപ് തച്ചുടയ്ക്കപ്പെട്ടതിന്റെ തിരശേഷിപ്പുകൾ കൊണ്ട് പ്രസിദ്ധമാണ് തിരുവിതാംകൂർ ദേവസ്വം ബോർഡിന് കീഴിലുള്ള കടുമംഗലം ശ്രീമഹാദേവർ ക്ഷേത്രം. ഏകദേശം പത്ത് ലക്ഷത്തോളം ചെലവ് വരുന്ന നന്ദികേശ രൂപം ഉപദേശക സമിതി വൈസ് പ്രസിഡന്റുകൂടിയായ ബിജു സൗജന്യമായാണ് നിർമ്മിച്ച് സമർപ്പിക്കുന്നത്. ഇരുപത് ദിവസം കൊണ്ടാണ് നിർമ്മാണം ഇതുവരെയെത്തിയത്. ഈമാസം 25 ന് നന്ദികേശനെ ക്ഷേത്രത്തിന് സമർപ്പിക്കാനാണ് തീരുമാനമെന്ന് ശിൽപി ബിജു ചക്കുവരയ്ക്കൽ പറഞ്ഞു.