ചേർപ്പ്: വിഷുസംക്രമ ദിനമായ ഇന്നലെ ചേർപ്പ് പൂച്ചിന്നിപ്പാടം ജെ.പി ജംഗ്ഷനിൽ വിവിധയിനം നാടൻ കാർഷിക വിഭവങ്ങൾ സൗജന്യമായി വിതരണം ചെയ്തു. പൊതുപ്രവർത്തകനായിരുന്ന ജയപ്രകാശ് പൂച്ചിന്നിപ്പാടത്തിന്റെ സ്മരണക്കായി ജെ.പി സേവ സമിതിയാണ് ചക്ക, മാങ്ങ, മാമ്പഴം,​ കായ, കണിക്കൊന്ന എന്നിവ വിതരണം ചെയ്തത്.

ഇവിടെയുള്ള കാർഷിക ഇനങ്ങൾ ആർക്കും സൗജന്യമായി എടുക്കാം എന്ന പോസ്റ്ററിന് മുന്നിലാണ് കാർഷിക വിഭവങ്ങൾ വിതരണം നടത്തിയത്. പ്രദേശത്തെ വിവിധ വീടുകളിൽ നിന്ന് ശേഖരിച്ച വസ്തുക്കളാണ് വിപണനം ചെയ്തത്. കഴിഞ്ഞ വർഷം വിഷു നാൾ മുതലാണ് ഈ സംരംഭം ആരംഭിച്ചത്. വിതരണോദ്ഘാടനം സമിതി പ്രവർത്തകൻ സി. കണ്ണൻ ഉദ്ഘാടനം ചെയ്തു. മധു, മോഹൻജി, ജീവൻ, നിർമ്മാല്യ തുടങ്ങിയവർ നേതൃത്വം നൽകി. ഇന്നലെ രാവിലെ മുതൽ ആരംഭിച്ച വിപണനം ഉച്ചവരെ നീണ്ടു.