തൃശൂർ: രണ്ടാം മിനിറ്റിൽ ദിൽഷാദ് അഹമ്മദ് അടിച്ച ഗോളിലൂടെ കാലിക്കറ്റ് സർവകലാശാല ഫുട്‌ബാൾ കിരീടം കോഴിക്കോട് ഫറോക്ക് കോളേജ് സ്വന്തമാക്കി. കേരളവർമ കോളേജിൽ നടന്ന ഫൈനലിൽ തൃശൂർ സെന്റ് തോമസ് കോളേജിനെയാണ് ഏകപക്ഷീയമായ ഒരു ഗോളിന് ഫറോക്ക് കോളേജ് തോൽപ്പിച്ചത്. ടൂർണമെന്റിൽ ഒരു ഗോൾ പോലും വഴങ്ങാതെയായിരുന്നു ഫറോക്കിന്റെ പ്രയാണം. 2016ന് ശേഷം ആദ്യമായാണ് ഫറോക്ക് കോളേജ് കിരീടം നേടുന്നത്. കേരളവർമ കോളേജ് സൂപ്രണ്ട് ഗോപാലകൃഷ്ണൻ സമ്മാനം വിതരണം ചെയ്തു. ആക്ടിംഗ് പ്രിൻസിപ്പൽ പ്രൊഫ. വി.എ നാരായണ മേനോൻ, കാലിക്കറ്റ് സർവകലാശാല അക്കാഡമിക് കൗൺസിൽ അംഗം ഹരിദയാൽ എന്നിവർ പങ്കെടുത്തു.