ചാവക്കാട്: ചാവക്കാട് പൊലീസ് സ്റ്റേഷൻ അങ്കണത്തിൽ ഒരുക്കിയ വിശപ്പു രഹിത പദ്ധതിയിലേക്ക് നമ്മൾ ചാവക്കാട്ടുകാർ ഒരാഗോള സൗഹൃദക്കൂട്ടിന്റെ കൈത്താങ്ങ്. പൊലീസിന്റെ നേതൃത്വത്തിൽ തുടക്കം കുറിച്ച ഫുഡ് ബാങ്ക് പദ്ധതിയിലേക്ക് അടുത്ത ഒരു വർഷത്തേക്ക് എല്ലാ ദിനവും ഭക്ഷണപ്പൊതികൾ നമ്മൾ ചാവക്കാട്ടുകാർ നൽകുന്നതിന്റെ ഉദ്ഘാടനം നഗരസഭാ ചെയർപേഴ്സൺ ഷീജ പ്രശാന്ത്, ചാവക്കാട് എസ്.എച്ച്.ഒ: കെ.പി. ജയപ്രകാശിന് കൂപ്പണുകൾ കൈമാറി നിർവഹിച്ചു.
നമ്മൾ ചാവക്കാട്ടുകാർ ഒരാഗോള സൗഹൃദക്കൂട്ട് ഗ്ലോബൽ കൺവീനർ ഡോ. റെൻഷി രഞ്ജിത്ത്, യു.എ.ഇ പ്രസിഡന്റ് മുബാറക് ഇമ്പാറക്, ഖത്തർ ട്രഷറർ കെ.കെ. മധുസൂദനൻ, ജാഫർ ഉമ്മർ, ചാവക്കാട് കമ്മിറ്റി ഭാരവാഹികളായ ഹക്കീം ഇമ്പാറക്, റസാഖ് അറയ്ക്കൽ, സി.എം. ജെനീഷ്, മൊയ്തീൻഷാ, കെ.എസ്. ബാബുരാജ്, ഉണ്ണി എന്നിവർ സംസാരിച്ചു.