തൃശൂർ: കൊവിഡ് വ്യാപനത്തിന്റെ പശ്ചാത്തലത്തിൽ പ്രതിരോധ പ്രവർത്തനങ്ങൾ കൂടുതൽ കാര്യക്ഷമമാക്കി ജില്ല. ഇതിന്റെ ഭാഗമായി എല്ലാ പഞ്ചായത്തുകളിലും ഡൊമിസിലിയറി കെയർ സെന്ററുകൾ ആരംഭിക്കും. ഓരോ പഞ്ചായത്തിലും കൊവിഡ് പോസിറ്റീവായവരെ താമസിപ്പിക്കുന്നതിന് വേണ്ടി സജ്ജമാക്കുന്ന ചെറു കേന്ദ്രങ്ങളാണ് ഡൊമിസിലിയറി കെയർ സെന്ററുകൾ. കൊവിഡ് പോസിറ്റീവായ ഗുരുതര ആരോഗ്യ പ്രശ്നങ്ങളില്ലാത്ത വീടുകളിൽ റൂം ഐസൊലേഷന് ആവശ്യമായ സൗകര്യമില്ലാത്തവർക്ക് താമസ സൗകര്യം ഒരുക്കുന്നതിനായാണ് ഡൊമിസിലിയറി കെയർ സെന്ററുകൾ ആരംഭിക്കുന്നത്. കൊവിഡ് പോസിറ്റീവ് കേസുകൾ കൂടുന്ന സാഹചര്യത്തിൽ ആശുപത്രികളിലും ഫസ്റ്റ് ലൈൻ ട്രീറ്റ്മെന്റ് സെന്ററുകളിലും ഉണ്ടാകാവുന്ന തിരക്ക് ഒഴിവാക്കുന്നതിന്റെ ഭാഗമായാണ് പുതിയ സംവിധാനം ഏർപ്പെടുത്തുക. 20 മുതൽ 30 വരെയുള്ള ആളുകൾക്ക് ഇവിടെ താമസ സൗകര്യമൊരുക്കും. 50 ശതമാനത്തിൽ കൂടുതൽ പോസിറ്റീവ് കേസുകൾ റിപ്പോർട്ട്‌ ചെയ്തിട്ടുള്ള എല്ലാ പഞ്ചായത്തുകളിലും നിയന്ത്രണങ്ങൾ കർശനമാക്കും. ശരിയായി മാസ്ക് ധരിക്കുന്നതിന്റെയും കൈകൾ സാനിറ്റൈസ് ചെയ്യുന്നതിന്റെയും സാമൂഹിക അകലം പാലിക്കുന്നതിന്റെയും ആവശ്യകത സംബന്ധിക്കുന്ന സന്ദേശങ്ങൾ കൂടുതലായി പൊതുജനങ്ങൾക്കിടയിലേക്ക് എത്തിക്കും. അതിരപ്പിള്ളി ട്രൈബൽ മേഖലയിൽ കൊവിഡ് പോസിറ്റീവ് നിരക്ക് വർദ്ധിച്ചു വരുന്ന സാഹചര്യത്തിൽ ഫോറസ്റ്റ് ഡിപ്പാർട്ട്മെന്റിനെയും മറ്റ് ബന്ധപ്പെട്ട അധികൃതരെയും ഉൾപ്പെടുത്തി പ്രത്യേക യോഗം ചേരും.