തിരുവനന്തപുരം : സംസ്ഥാനത്ത് തുടർച്ചയായ അഞ്ചാം ദിവസവും കൊവി‌ഡ് രോഗികളുടെ കുതിപ്പ് തുടരുന്നു. ഇന്നലെ 6,986 പേർക്കാണ് രോഗം ബാധിച്ചത്. 24 മണിക്കൂറിനിടെ 65,003 സാമ്പിളുകൾ പരിശോധിച്ചു. 10.75 ശതമാനമാണ് ടെസ്റ്റ് പോസിറ്റിവിറ്റി നിരക്ക്. കഴിഞ്ഞ ദിവസത്തെക്കാൾ 792 രോഗികളാണ് ഇന്നലെ വർദ്ധിച്ചത്. 27 ആരോഗ്യ പ്രവർത്തകർ രോഗബാധിതരായി. 16 മരണങ്ങളും റിപ്പോർട്ട് ചെയ്തു. ഇന്നലെ രോഗം സ്ഥിരീകരിച്ചവരിൽ 6258 പേർ സമ്പർക്കരോഗികളാണ്. 504 പേരുടെ ഉറവിടം വ്യക്തമല്ല. കോഴിക്കോട് 1271, എറണാകുളം 842, മലപ്പുറം 728, കോട്ടയം 666, കണ്ണൂർ 575, തിരുവനന്തപുരം 525, തൃശൂർ 423, ആലപ്പുഴ 339, പാലക്കാട് 325, കൊല്ലം 304, ഇടുക്കി 291, കാസർകോട് 251, പത്തനംതിട്ട 246, വയനാട് 200 എന്നിങ്ങനെയാണ് പുതിയ രോഗികൾ. അതേസമയം 2358 പേർ രോഗമുക്തരായി. വിവിധ ജില്ലകളിലായി 1,70,810 പേരാണ് നിരീക്ഷണത്തിലുള്ളത്. ഇവരിൽ 1,64,325 പേർ വീട് / ഇൻസ്റ്റിറ്റ്യൂഷണൽ ക്വാറന്റൈനിലും 6485 പേർ ആശുപത്രികളിൽ നിരീക്ഷണത്തിലുമാണ്.

ആകെ രോഗികൾ 1167190

ചികിത്സയിലുള്ളവർ 44,389

രോഗമുക്തർ 11,17,700

ആകെ മരണം 4783