വർക്കല: ഹരിഹരപുരത്ത് പട്ടികജാതിക്കാരിയായ വീട്ടമ്മയെ മർദ്ദിച്ച കേസിൽ അയൽവാസിയെ അയിരൂർ പൊലീസ് അറസ്റ്റുചെയ്‌തു.ഹരിഹരപുരം നെല്ലേറ്റുമുക്കിൽ തട്ടൻഅഴികം വീട്ടിൽ സുഭാഷിനെയാണ് (38) അയിരൂർ പൊലീസ് അറസ്റ്റുചെയ്‌തത്. തോണിപ്പാറ കുടുംബാരോഗ്യ കേന്ദ്രത്തിന് സമീപം വാടകവീട്ടിൽ താമസിക്കുന്ന ലതികയെയാണ് (53) സുഭാഷ് ക്രൂരമായി മർദ്ദിച്ചത്. അമിതമായി മദ്യപിച്ചെത്തിയ സുഭാഷ് ലതികയെ ആക്രമിക്കുകയായിരുന്നെന്ന് പൊലീസ് പറഞ്ഞു.
ഗുരുതരമായി പരിക്കേറ്റ ലതിക ഭയന്ന് രണ്ട് ദിവസമായി മുറിയിൽ നിന്ന് പുറത്തിറങ്ങിയിരുന്നില്ല. നാട്ടുകാർ വിവരമറിയിച്ചതിനെ തുടർന്ന് അയിരൂർ പൊലീസ് സ്ഥലത്തെത്തി ഇവരെ പാരിപ്പള്ളി മെഡിക്കൽ കോളേജ് ആശുപത്രിയിൽ പ്രവേശിപ്പിക്കുകയായിരുന്നു. സംഭവം നടന്നത് പരവൂർ സ്റ്റേഷൻ പരിധിയിലായതിനാൽ പരവൂർ പൊലീസിന് പ്രതിയെ കൈമാറുമെന്ന് വർക്കല ഡിവൈ.എസ്.പി ബാബുകുട്ടൻ അറിയിച്ചു.