തിരുവനന്തപുരം: സംസ്ഥാന സർക്കാരിന്റെ സ്വയംഭരണസ്ഥാപനമായ കേരള മീഡിയ അക്കാഡമി നടത്തുന്ന വീഡിയോ എഡിറ്റിംഗ് സർട്ടിഫിക്കറ്റ് കോഴ്സിന് ഏപ്രിൽ 24 വരെ അപേക്ഷിക്കാം. തിയറിയും പ്രാക്ടിക്കലും ഉൾപ്പെടെ 6 മാസമാണ് കോഴ്സിന്റെ കാലാവധി. 30 പേർക്കാണ് പ്രവേശനം. അതിനൂതന സോഫ്റ്റ്‌വെയറുകളിൽ പരിശീലനം നൽകും.സർക്കാർ അംഗീകാരമുള്ള കോഴ്സിന് 30,000/ രൂപയാണ് ഫീസ്. പട്ടികജാതി/പട്ടികവർഗ/ഒ.ഇ.സി വിദ്യാർത്ഥികൾക്ക് ഫീസ് ആനുകൂല്യം ലഭിക്കും. പ്ലസ് ടു വിദ്യാഭ്യാസയോഗ്യതയുള്ളവർക്ക് അപേക്ഷിക്കാം. അടിസ്ഥാന യോഗ്യതാ പരീക്ഷയുടെ മെറിറ്റ് അടിസ്ഥാനത്തിലായിരിക്കും പ്രവേശനം. പ്രായം 31.1.2021ൽ 30 വയസ് കവിയരുത്. പട്ടികവിഭാഗക്കാർക്ക് അഞ്ച് വയസ് ഇളവുണ്ട്. കോഴ്സിന്റെ പ്രായോഗിക പരിശീലനത്തിന് സുസജ്ജമായ എഡിറ്റ് സ്യൂട്ട്, ആർട്ട് സ്റ്റുഡിയോ, ഔട്ട്‌ഡോർ വീഡിയോ ഷൂട്ടിംഗ് സംവിധാനം എന്നിവ അക്കാഡമി ക്രമീകരിച്ചിട്ടുണ്ട്. www.keralamediaacademy.org ൽ നിന്നു ഫോറം ഡൗൺലോഡ് ചെയ്ത് സമർപ്പിക്കാം. അപേക്ഷയോടൊപ്പം സർട്ടിഫിക്കറ്റുകളുടെ പകർപ്പും വയ്ക്കണം. സെക്രട്ടറി, കേരള മീഡിയ അക്കാദമി, കാക്കനാട് എന്ന പേരിൽ എറണാകുളം സർവീസ് ബ്രാഞ്ചിൽ മാറാവുന്ന 300 രൂപയുടെ (പട്ടിക വിഭാഗക്കാർക്ക് 150 രൂപ) ഡിമാൻഡ് ഡ്രാ്ര്രഫും നൽകണം. അവസാന തീയതി ഏപ്രിൽ 24. കൂടുതൽ വിവരങ്ങൾക്ക് : 0484 2422275.