തിരുവനന്തപുരം:കൊവിഡ് രോഗവ്യാപനം വർദ്ധിക്കുന്നതിന്റെയും രാത്രികാല കർഫ്യൂ പ്രഖ്യാപിച്ചതിന്റെയും അടിസ്ഥാനത്തിൽ ജില്ലയിൽ പൊലീസ് സുരക്ഷാ പരിശോധന കൂടുതൽ ശക്തമാക്കി.ഡെപ്യൂട്ടി പൊലീസ് കമ്മിഷണർ ഡോ.വൈഭവ് സക്‌സേനയുടെ നേതൃത്വത്തിൽ നഗരത്തിൽ പൊലീസ് ഇന്നലെ നടത്തിയ പരിശോധനയിൽ കൊവിഡ് സുരക്ഷാലംഘനം നടത്തിയ 2116 പേർക്കെതിരെ നിയമനടപടി സ്വീകരിച്ചു.
രോഗവ്യാപനം ഉണ്ടാക്കുന്ന തരത്തിൽ വിലക്ക് ലംഘനം നടത്തിയ 583 പേർക്കെതിരെയാണ് കേസെടുത്തത്. മാസ്ക് ധരിക്കാത്തതിന് 1505 പേരിൽ നിന്നും സാമൂഹിക അകലം പാലിക്കാത്തതിന് 17 പേരിൽ നിന്നുമായി 7,61,000 രൂപ പിഴ ഈടാക്കി. നിർദ്ദേശങ്ങൾ പാലിക്കാതെ സർവീസ് നടത്തിയ മൂന്ന് വാഹനങ്ങൾക്കെതിരെയും എട്ട് കടകൾക്കെതിരെയും നിയമനടപടി സ്വീകരിച്ചിട്ടുണ്ട്. മുൻകരുതൽ എടുക്കാത്ത 5134 പേർക്ക് താക്കീത് നൽകി വിട്ടയച്ചു.