തിരുവനന്തപുരം: കിംസ് ആശുപത്രിയും ഇൻസ്റ്റിറ്റ്യൂട്ട് ഒഫ് കമ്പനി സെക്രട്ടറീസ് ഒഫ് ഇന്ത്യയും (ഐ.സി.എസ്.ഐ) ചേർന്ന് സംഘടിപ്പിക്കുന്ന ആരോഗ്യ പദ്ധതിയ്ക്ക് തുടക്കമായി. ഐ.സി.എസ്.ഐ അംഗങ്ങൾക്കും കുടുംബാംഗങ്ങൾക്കും ചികിത്സാ ഇളവ് ലഭ്യമാക്കുന്ന പദ്ധതിയുടെ രേഖകൾ കിംസ് ഹെൽത്ത്‌ കെയർ പ്രൊമോഷൻസ് ഗ്രൂപ്പ് ഹെഡ് വൈ.ആർ. വിനോദ് ഐ.സി.എസ്.ഐ തിരുവനന്തപുരം ചാപ്ടർ ചെയർമാൻ എസ്. ബാലമുരളിക്ക് കൈമാറി. പദ്ധതിരേഖകളിൽ ഇരുവരും ഒപ്പുവെച്ചു. ഐ.സി.എസ്.ഐയുടെ സംസ്ഥാനത്തെ അഞ്ച് ചാപ്ടറുകളിലായി 900 അംഗങ്ങളും അവരുടെ കുടുംബാംഗങ്ങളും ആരോഗ്യ പദ്ധതിയുടെ ഗുണഭോക്താക്കളാകും. അതോടൊപ്പം ഐ.സി.എസ്.ഐ നടത്തുന്ന കോഴ്‌സുകളിൽ പഠിക്കുന്ന ഏഴായിരത്തോളം വിദ്യാർത്ഥികൾക്കും പദ്ധതി പ്രകാരമുള്ള ചികിത്സാ ഇളവ് ലഭ്യമാവും. കിംസ് ആശുപത്രിയിൽ ബുധനാഴ്ച നടന്ന ചടങ്ങിൽ ഐ.സി.എസ്.ഐ തിരുവനന്തപുരം ചാപ്ടർ സെക്രട്ടറി ജി. അനിൽകുമാർ, കിംസ് ഗ്രൂപ്പ് കമ്പനി സെക്രട്ടറി എം. ശ്യാംകുമാർ എന്നിവർ പങ്കെടുത്തു.