തിരുവനന്തപുരം: കെ.എസ്.ആർ.ടി.സി ഇന്നും നാളെയും 60 ശതമാനം ദീർഘദൂര, ഓർഡിനറി സർവ്വീസുകൾ നടത്തും. കൊവിഡ് രണ്ടാം ഘട്ട വ്യാപനത്തിന് മുൻപ് ഞാറാഴ്ചകളിൽ ഏകദേശം 2300 ബസുകളാണ് സർവ്വീസ് നടത്തിയിരുന്നത്. ഇതിന്റെ 60% സർവ്വീസുകളാണ് ഈ ദിവസങ്ങളി‍ൽ ഓപ്പറേറ്റ് ചെയ്യുന്നത്.

ഹയർ സെക്കൻഡറി പരീക്ഷ എഴുതുന്ന വിദ്യാർത്ഥികൾക്ക് യഥാസമയം പരീക്ഷ സെന്ററുകളിൽ എത്തുന്നതിനും, എയർപോർട്ട്, റെയിൽവേ സ്റ്റേഷൻ, ആശുപത്രികൾ എന്നിവിടങ്ങളിൽ എത്തുന്ന യാത്രാക്കാർക്കും വേണ്ടിയുള്ള സർവ്വീസുകൾ ഉറപ്പാക്കുമെന്ന് സി.എം.ഡി ബിജുപ്രഭാകർ അറിയിച്ചു. കെ.എസ്.ആർ.ടി.സിയിലെ ഓഫീസ് വിഭാ​ഗം ജീവനക്കാർക്ക് ഇന്ന് അവധിയായിരിക്കും. മെക്കാനിക്കൽ , ഓപ്പറേറ്റിം​ഗ് വിഭാ​ഗങ്ങളിലെ ജീവനക്കാർക്ക് മറ്റൊരു ദിവസം അവധി നൽകും..