ദക്ഷിണേന്ത്യൻ സൂപ്പർസ്റ്റാർ ശശികുമാർ നായകനാകുന്ന പുതിയ തമിഴ് ചിത്രത്തിൽ മലയാളികളുടെ പ്രിയനടൻ അപ്പാനി ശരത്ത് വില്ലനാകുന്നു. തമിഴിൽ കഴുഗു, ബെൽബോട്ടം, ശിവപ്പ്, 1945 തുടങ്ങിയ സിനിമകൾ സംവിധാനം ചെയ്ത സത്യശിവയുടെ പുതിയ സസ്‌പെൻസ് ത്രില്ലറിലാണ് വില്ലനായി അപ്പാനി ശരത്ത് വരുന്നത്. ചിത്രത്തിന്റെ രണ്ടാം ഷെഡ്യൂൾ തമിഴ്നാട്ടിൽ പുരോഗമിക്കുകയാണ്. ലിജോ ജോസ് പെല്ലിശ്ശേരി ഒരുക്കിയ സൂപ്പർഹിറ്റ് ചിത്രം അങ്കമാലി ഡയറീസിലെ മികച്ച പ്രകടനമാണ് ശരത്തിന് മലയാളത്തിൽ കൂടുതൽ അവസരങ്ങൾ ഒരുക്കിയത്. തുടർന്ന് തമിഴിലും ഒട്ടേറെ ചിത്രങ്ങളിൽ അഭിനയിച്ചു. വെളിപാടിന്റെ പുസ്തകം, പോക്കിരി സൈമൺ, പൈപ്പിൻ ചുവട്ടിലെ പ്രണയം, ചെക്ക ചിവന്ത വാനം, സണ്ടക്കോഴി 2, കോണ്ടസ, സച്ചിൻ, ലൗ എഫ് എം തുടങ്ങിയ സിനിമകളിലും ഓട്ടോശങ്കർ എന്ന വെബ് സീരീസ്, അമല എന്ന തമിഴ് ചിത്രത്തിലുമൊക്കെ ശരത്ത് മികച്ച പ്രകടനമാണ് കാഴ്ച വെച്ചത്. മിഷൻ സി, ചുങ്കം കിട്ടിയ ആട്ടിൻ കൂട്ടം, ചാരം, ബെർനാർഡ്, മിയ കുൽപ്പ തുടങ്ങിയ സിനിമകളും കാളിയാർ കോട്ടേജ് എന്ന വെബ് സീരീസും അപ്പാനി ശരത്തിന്റേതായി പുറത്തിറങ്ങാനുണ്ട്. ഇതിനിടെ ജെല്ലിക്കെട്ട് പശ്ചാത്തലത്തിൽ ഒരുങ്ങുന്ന പുതിയ തമിഴ് ചിത്രവും തമിഴ്നാട്ടിൽ ചിത്രീകരണം പുരോഗമിക്കുകയാണ്. ജെല്ലിക്കെട്ട് കാളകൾക്കൊപ്പമുള്ള അപ്പാനി ശരത്തിന്റെ ചിത്രം ഇതിനകം സോഷ്യൽ മീഡിയയിൽ വലിയ തരംഗമായി മാറിയിരുന്നു. ദക്ഷിണേന്ത്യയിൽ മികച്ച നടൻമാരിലൊരാളായ ശശികുമാർ സാറിനൊപ്പം തനിക്ക് അഭിനയിക്കാൻ കഴിഞ്ഞതിൽ അഭിമാനവും സന്തോഷവുമുണ്ടെന്ന് അപ്പാനി ശരത്ത് പ്രതികരിച്ചു. "അദ്ദേഹത്തോടൊപ്പമുള്ള ചിത്രീകരണ അനുഭവം ഏറെ സന്തോഷകരമാണ്. അഭിനയ ജീവിതത്തിലെ മറക്കാനാവാത്ത ഓർമ്മകളാണ് അതെല്ലാം. ആ ചിത്രവും വളരെ മികച്ച ഒരു പ്രമേയമാണ് മുന്നോട്ട് വെയ്ക്കുന്നത്. ഞാൻ ഇതുവരെ അഭിനയിച്ചിട്ടുള്ള കഥാപാത്രങ്ങളിൽ നിന്ന് തികച്ചും വ്യത്യസ്തമാണ് ഈ ചിത്രത്തിലേത്. തമിഴിൽ എനിക്ക് ഏറെ ശോഭിക്കാനുള്ള ഒരു ചിത്രമാണിത്. ശരിക്കും ഒരു മാസ് കഥാപാത്രം." ചിത്രം ഏറെ പ്രതീക്ഷയുള്ളതാണെന്നും അപ്പാനി ശരത്ത് സൂചിപ്പിച്ചു. അനീസ് സംവിധാനം ചെയ്യുന്ന പഗൈവനുക്ക് അരുവൈ എന്ന സിനിമയ്ക്ക് ശേഷം ശശികുമാർ നായകനാകുന്ന ചിത്രം കൂടിയാണിത്. സുബ്രഹ്മണ്യപുരം, നാടോടികൾ തുടങ്ങിയ ശ്രദ്ധേയ തമിഴ് ചിത്രങ്ങളിലൂടെ മലയാളികളുടെ പ്രിയപ്പെട്ട നടനാണ് ശശികുമാർ. മാസ്റ്റേഴ്സ് എന്ന മലയാള സിനിമയിലും ശശികുമാർ അഭിനയിച്ചിരുന്നു. ശശികുമാറും അപ്പാനി ശരത്തും ഒന്നിക്കുന്ന ചിത്രത്തിന്റെ നിർമ്മാണം ചെന്തൂർ ഫിലിംസാണ്. ഹരിപ്രിയയാണ് ചിത്രത്തിലെ നായിക. കൊവിഡ് മാനദണ്ഡങ്ങൾ പാലിച്ചുകൊണ്ട് സിനിമയുടെ ചിത്രീകരണം തമിഴ്നാട്ടിൽ പുരോഗമിക്കുകയാണ്.