ആറ്റിങ്ങൽ: ആറ്റിങ്ങൽ നഗരസഭയുടെ നേതൃത്വത്തിൽ സി.എസ്.ഐ സ്കൂളിൽ ആരംഭിക്കുന്ന കൊവിഡ് പ്രാഥമിക ചികിത്സാ കേന്ദ്രത്തിൽ 150 കിടക്കൾ സജ്ജീകരിച്ചു. ചെയർപേഴ്സൺ അഡ്വ. എസ്. കുമാരി,​ കൗൺസിലർമാരായ ആർ. രാജു,​ ശങ്കർ.ജി,​ സെക്രട്ടറി എസ്. വിശ്വനാഥൻ,​ ആരോഗ്യ വിഭാഗം ഉദ്യോഗസ്ഥരായ ബി. അജയകുമാർ,​ എസ്.എസ്. മനോജ്,​ എ.ആർ. ആരീഷ് എന്നിവർ സ്കൂളിലെത്തി പ്രവർത്തനങ്ങൾ വിലയിരുത്തി. വനിതകൾക്കും പുരുഷന്മാർക്കും പ്രത്യേകം ബ്ലോക്കുകളാണ് സജ്ജീകരിച്ചിട്ടുള്ളത്. കെട്ടിടത്തിലെ ടൊയ്‌ലെറ്റുകൾ അണുവിമുക്തമാക്കുകയും ഭക്ഷണ മാലിന്യങ്ങൾ,​ മെഡിക്കൽ വേസ്റ്റുകൾ,​ ഇ വേസ്റ്റുകൾ എന്നിവ നിർമ്മാർജ്ജനം ചെയ്യാനുള്ള സംവിധാനങ്ങളും ആരോഗ്യ പ്രവർത്തകർക്ക് താമസിക്കാനും സാധന സാമഗ്രികൾ സൂക്ഷിക്കാനും പ്രത്യേകം മുറികളും ഇവിടെ ഒരുക്കിയിട്ടുണ്ട്. നിർമ്മാണ പ്രവർത്തനങ്ങൾ പൂർത്തിയാക്കി ഇന്ന് വൈകിട്ടോടെ കൊവിഡ് നോഡൽ ഓഫീസർക്ക് കെട്ടിടം കൈമാറുമെന്ന് ചെയർപേഴ്സൺ അറിയിച്ചു.