ആലപ്പുഴ: നഗരത്തിലെ കനാലുകളി​​ലൊക്കെ വീണ്ടും പോളയും പായലും നി​റയുകയാണ്. ഇത് നീക്കം ചെയ്യുവാനുള്ള നടപടി​കൾ എങ്ങുമെത്താതെ നീളുന്നു.

ഒരു വഴി​പാട് പോലെയാണ് കാലാ കാലങ്ങളി​ൽ പോള വാരൽ യജ്ഞം നടത്തുന്നത്. തുടർന്ന് കനാലുകളി​ൽ വീണ്ടും പോള നി​റഞ്ഞ് പഴയ പടി​യാകും. കൃത്യമായ സമയ ഇടവേളകളി​ൽ ഇവ നീക്കം ചെയ്യാൻ സംവി​ധാനമൊരുക്കാത്തതാണ് പ്രശ്നമെന്നാണ് ആക്ഷേപം.

ജലസേചന വകുപ്പിന്റെ നിയന്ത്രണത്തിൽ 2019 മാർച്ചിലാണ് 39 കോടി ചെലവഴിച്ച് നവീകരണത്തിന്റെ ആദ്യഘട്ടമായി​ വാടക്കനാൽ, കൊമേഴ്സ്യൽ കനാൽ, ഉപ്പൂറ്റി കനാൽ, ആലപ്പുഴ- ചേർത്തല (എ-എസ്) കനാലുകളുടെ നവീകരണ ജോലികൾ നടത്തി​യത്. നാല് മാസം എത്തും മുമ്പുതന്നെ കനാലുകളിൽ പോള നിറഞ്ഞു. നിലവിൽ എ.എസ് കനാലിലെ പോള തൊഴിലാളികളെ ഉപയോഗിച്ച് രണ്ട് തവണ നീക്കം ചെയ്തു.

#സ്ഥിരമായി പോളനീക്കാൻ യന്ത്രം

നവീകരിച്ച ഭാഗത്ത് നി​റയുന്ന പോളയും മറ്റും നീക്കം ചെയ്യാൻ രണ്ടുമാർഗങ്ങളാണ് തുടക്കത്തി​ൽ ആലോചി​ച്ചത്. തൊഴിലാളി ഉപയോഗിച്ചുള്ള നീക്കം ചെയ്യലും കടലിൽ നിന്ന് മുറിഞ്ഞപൊഴി വഴി ഉപ്പുവെള്ളം കയറ്റിയുള്ള പോള നശിപ്പിക്കലും. എന്നാൽ ഇവ രണ്ടും പ്രായോഗികമല്ലെന്ന് കണ്ടെത്തിയതിനെ തുടർന്നാണ് സ്ഥിരമായി പോളനീക്കാൻ കേരള ഇറിഗേഷൻ ഇൻഫ്രാസ്ട്രക്ചർ ഡെവലപ്‌മെന്റ് കോർപറേഷൻ പോളവാരൽ യന്ത്രം വാങ്ങാൻ തീരുമാനിച്ചത്. ആധുനിക പോളവാരൽ യന്ത്രം വാങ്ങാനുള്ള കരാർ ഉറപ്പിക്കാൻ കഴിയാത്ത നി​ലയി​ലാണ് അധികൃതർ. ‌

തിരഞ്ഞെടുപ്പ് ചട്ടം നിലവിൽ വരുന്നതിന് മുമ്പേ വിളിച്ചിരുന്ന ടെൻഡർ കഴിഞ്ഞ ദിവസം പരിശോധിച്ചു. തുടർ നടപടി ആരംഭിക്കാനുള്ള തയ്യാറെടുപ്പിനിടെ ലോക്ക്ഡൗൺ എത്തിയതും വിനയായി. ഇപ്പോൾ ഒരുമാസത്തി​നുള്ളി​ലെങ്കി​ലും പോളവാരൽ യന്ത്രമെത്തുമെന്ന പ്രതീക്ഷയി​ലാണ് അധി​കൃതർ.

കുടുക്കാൻ നി​രീക്ഷണ കാമറകൾ

നവീകരിച്ച കനാലുകളിലെ പോളയും പായലും നീക്കുന്നതിനും കനാലുകളിൽ മാലിന്യം നിക്ഷേപിക്കുന്നവരെ കണ്ടെത്താൻ നിരീക്ഷണ കാമറകൾക്കുമായി രണ്ട് കോടിയുടെ പദ്ധതി കിഫ്ബിയുടെ അംഗീകാരം നൽകിയിരുന്നു. ഇതിന് പുറമേ കനാൽ നവീകരണത്തിന്റെ രണ്ടാംഘട്ടത്തിനുള്ള 42കോടി രൂപയുടെ പദ്ധതിക്കും കിഫ്ബി അനുമതി നൽകി.

'വീഡ് ഹർവെസ്റ്റർ' യന്ത്രത്തി​ന്റെ വില 60 ലക്ഷമാണ്. പദ്ധതി നടത്തിപ്പിന്റെ ചുമതല കേരള ഇറിഗേഷൻ ഇൻഫ്രാസ്ട്രക്ചർ ഡെവലപ്‌മെന്റ് കോർപറേഷൻ അധികൃതർക്കാണ്. മാലിന്യ നിക്ഷേപകരെ കണ്ടെത്താനായി 25 സ്ഥലങ്ങളിലായി 60 നിരീക്ഷണ കാമറകൾ സ്ഥാപിക്കും. ഇവ നോർത്ത്, സൗത്ത് പൊലീസ് സ്റ്റേഷനുകളുമായി ബന്ധിപ്പിക്കും.
ഇപ്പോൾ മട്ടാഞ്ചേരി പാലം മുതൽ കൊമ്മാടി പാലം വരെ എ.എസ് കനാലിന്റെ ഇരുകരിലേക്ക് നടന്നു കയറാൻ കഴിയുന്ന തരത്തിൽ പോളയും പായലും വള്ളിയും കൊണ്ട് നിറഞ്ഞു. മട്ടാഞ്ചേരി പാലം മുതൽ കലവൂർ ജംഗ്ഷൻ വരെയുള്ള ഭാഗത്തെ 9 പാലങ്ങളുടെ നിർമ്മാണവും പുരോഗമിക്കുകയാണ്. ഈ ഭാഗത്തെ കനാലിൽ പോള നിറഞ്ഞത് നിർമ്മാണത്തിന് തടസമാകുന്നുണ്ട്. ഇവിടെ നീരൊഴുക്ക് കുറവായതാണ് അടിക്കടി പോള നിറയാൻ പ്രധാന കാരണം. നിരന്തരം ബോട്ടുകളും വള്ളങ്ങളും സഞ്ചരിക്കുന്നതിനാൽ വാടക്കനാലിൽ മാത്രമാണ് പോളശല്യം അല്പം കുറവുള്ളത്. മറ്റു കനാലുകൾ നിശ്ചലമായതിനാൽ പോള വേഗം വളരാൻ കാരണമാകുന്നു.

..............................

60

വീഡ് ഹർവെസ്റ്റർ' യന്ത്രത്തി​ന്റെ വില 60 ലക്ഷമാണ്

60

മാലിന്യ നിക്ഷേപകരെ കണ്ടെത്താനായി 25 സ്ഥലങ്ങളിലായി 60 നിരീക്ഷണ കാമറകൾ സ്ഥാപിക്കും.

#രണ്ടാം ഘട്ടത്തിൽ

നഗരസഭയിലെ 57 ചെറുകനാലുകളുടെ നവീകരണം, കൽക്കെട്ട്, ആലപ്പുഴ-ചേർത്തല കനാലിൽ പുതിയ 8 പാലങ്ങൾ, നഗരത്തിലൂടെ ഒഴുകുന്ന കാപ്പിത്തോടിന്റെ നവീകരണം, പൊളവാരൽ യന്ത്രം, നിരീക്ഷണ കാമറകൾ എന്നിവയാണ് പദ്ധതി​യി​ലുള്ളത്.

"ടെൻഡർ കവർ പൊട്ടിച്ചെങ്കിലും കരാർ ഉറപ്പിക്കാനുള്ള നടപടികൾക്ക് ഇടയിലാണ് ലോക്ക്ഡൗൺ നിലവിൽ വന്നത്. ഇപ്പോഴത്തെ അവസ്ഥയിൽ ഒരുമാസത്തിനുള്ളിൽ ആധുനിക പോളവാരൽ യന്ത്രം ആലപ്പുഴയിൽ എത്തും.

കെ.പി.ഹരൻബാബു, ഡെപ്യൂട്ടി ജനറൽ മാനേജർ,കേരള ഇറിഗേഷൻ ഇൻഫ്രാസ്ട്രക്ചർ ഡെവലപ്‌മെന്റ് കോർപറേഷൻ