ഡെങ്കുവി​നെ തടയാം

ആലപ്പുഴ: കൊവി​ഡും മഴക്കെടുതി​യും ചുഴലി​ക്കാറ്റും ഒക്കെയായി​ ദുരി​തക്കടലി​ലായി​രി​ക്കുന്ന വർക്കി​ടയി​ലേയ്ക്ക് ഡെങ്കി​പ്പനി​യും കൂടി​ വന്നാലോ? അത്തരം ഒരവസ്ഥയുണ്ടാകാതി​രി​ക്കാൻ പ്രതി​രോധ നി​ർദ്ദേശങ്ങളുമായി​ രംഗത്തു വന്നി​രി​ക്കുകയാണ് ആരോഗ്യവകുപ്പ്.

മഴ കനത്തതോടെ ഡെങ്കിയുടെ കാര്യത്തിലും അതീവ ശ്രദ്ധ പതിപ്പിക്കണമെന്ന് ജില്ല മെഡിക്കൽ ഓഫീസ് അറിയിച്ചു.

ഉറവിട നശീകരണം പ്രധാനം

മഴപെയ്യുന്നത് അലക്ഷ്യമായി പുറത്തുകിടക്കുന്ന വസ്തുക്കളിൽ ശുദ്ധജലം കെട്ടിക്കിടക്കാനിടയാക്കും. ഡെങ്കിപ്പനി പരത്തുന്ന കൊതുക് ശുദ്ധജലത്തിൽ മുട്ടയിട്ട് പെരുകുന്നത്. കൂത്താടി നിയന്ത്രണത്തിനായി ഉറവിട നശീകരണം ഉറപ്പാക്കിയില്ലെങ്കിൽ രോഗവ്യാപനം കൂടും. ഇതിന് ഓരോവ്യക്തികളും തന്റേതായ പങ്ക് വഹിക്കണം.

ശ്രദ്ധിക്കേണ്ട കാര്യങ്ങൾ

വീടിന്റെ പരിസരം നിരീക്ഷിക്കുന്നതിനും വൃത്തിയാക്കുന്നതിനും സമയം കണ്ടെത്തണം

ഉപയോഗശൂന്യമായ പാത്രങ്ങൾ വലിച്ചെറിയാതെ സുരക്ഷിതമായി സംസ്‌ക്കരിക്കുക,

റഫ്രി​ജറേറ്ററിന്റെ പുറകിലെ ട്രേ, ചെടിച്ചട്ടികൾക്കടിയിലെ പാത്രം, അലങ്കാരച്ചെടികളുടെ പാത്രം

തുടങ്ങിയവയിലെ വെള്ളം ആഴ്ചയിൽ ഒരിക്കൽ മാറ്റുക

വെള്ളം ശേഖരിച്ച് വയ്ക്കുന്ന പാത്രങ്ങൾ, ടാങ്കുകൾ, സിമെന്റ് തൊട്ടികൾ തുടങ്ങിയവ ആഴ്ചയിൽ ഒരിക്കൽ നന്നായി ഉരച്ചു കഴുകണം

കൊതുക് കടക്കാത്ത വിധം വലയോ തുണിയോ കൊണ്ട് പൂർണമായി മൂടുക

കരിക്കിൻതൊണ്ട്, മച്ചിങ്ങ, ചിരട്ടകൾ, കമുകിൻ പാള, ടയറുകൾ തുടങ്ങിയവയിൽ വെള്ളം കെട്ടിനിൽക്കരുത്

ചിരട്ടകൾ കമഴ്ത്തി വയ്ക്കുക, ടെറസിലേയും സൺഷെയ്ഡിലേയും വെള്ളം ഒഴുക്കിക്കളയുക

ചപ്പുചവറുകളും നീക്കി​ വീടും പരിസരവും പൊതുസ്ഥലങ്ങളും വൃത്തിയായി സൂക്ഷിക്കുക

പ്ലാസ്റ്റിക് വേലിയുടെ അടിഭാഗത്ത് വെള്ളം കെട്ടി നിൽക്കാൻ ഇടയാക്കരുത്

സെപ്റ്റിക്ക് ടാങ്കിന്റെ വെന്റ് പൈപ്പിന്റെ അഗ്രം കൊതുക് വല കൊണ്ട് മൂടിക്കെട്ടുക,

ഉപയോഗിക്കാത്ത കിണർ, കുളം, വെള്ളക്കെട്ട് എന്നിവിടങ്ങളിൽ ഗപ്പി മത്സ്യം വളർത്തുക,

വാതിലുകൾ ജനാലകൾ എയർഹോളുകൾ എന്നിവിടങ്ങളിൽ വല പിടിപ്പിക്കുക

കൊതുക് വലയുടെ ശരിയായ ഉപയോഗം പ്രോത്സാഹിപ്പിക്കുക

ആഴ്ചയിൽ ഒരിക്കൽ കൊതുകിന്റെ ഉറവിട നശീകരണം (ഡ്രൈഡോ ആചരണം) നടത്തുക