ആലപ്പുഴ: ആലപ്പുഴ നഗരസഭയിലെ തീരദേശ വാർഡുകളായ തുമ്പോളി, മംഗലം, കാഞ്ഞിരംചിറ, വാടക്കാനാൽ വാർഡുകളിൽ കൊവിഡ് രോഗവ്യാപനം രൂക്ഷമായ സാഹചര്യത്തിൽ വാർഡ് നിവാസികൾക്ക് സൗജന്യ ഭക്ഷണം എത്തിക്കാനായി കമ്മ്യൂണിറ്റി കിച്ചൺ ആരംഭിച്ചു. തുമ്പോളി ഇടവക പള്ളിയുടെ പാരിഷ് ഹാളിൽ പ്രവർത്തിക്കുന്ന കമ്മ്യൂണിറ്റി കിച്ചൺ ആലപ്പുഴ നഗരസഭയുടെ കീഴിലാണ്. നിയുക്ത എം.എൽ.എ പി.പി. ചിത്തരഞ്ജൻ ഉദ്ഘാടനം ചെയ്തു. വാർഡ് കൗൺസിലർമാരായ ഡോ. ലിന്റ ഫ്രാൻസ്, പി. റഹിയാനത്ത്, പി.ജി. എലിസബത്ത്, കെ.എ. ജെസിമോൾ, നഗരസഭാ ഉദ്യോഗസ്ഥർ, ജാഗ്രതാ സമിതി അംഗങ്ങൾ, സന്നദ്ധ പ്രവർത്തകർ തുടങ്ങിയവർ പങ്കെടുത്തു. നാലു വാർഡുകളിലായി 1200 പേർക്കാണ് ആദ്യദിനം ഭക്ഷണം വിതരണം ചെയ്തത്. വരുംദിവസങ്ങളിൽ കൂടുതൽ പേർക്ക് ആവശ്യമെങ്കിൽ ഭക്ഷണം എത്തിച്ചു നൽകുമെന്നും ഭക്ഷണം ആവശ്യമായവർ പ്രദേശത്തെ വാർഡ് കൗൺസിലറുമായി ബന്ധപ്പെടണമെന്നും ചിത്തരഞ്ജൻ അറിയിച്ചു. നിലവിൽ കൊവിഡ് രോഗബാധികർക്കും നിരീക്ഷണത്തിൽ കഴിയുന്നവർക്കുമാണ് സൗജന്യ ഭക്ഷണം വീടുകളിൽ എത്തിച്ചു നൽകുന്നത്.