കായംകുളം: നഗരസഭയിൽ കൊവിഡിന്റെ മറവിൽ രാഷ്ട്രീയ മുതലെടുപ്പ് നടത്തുകയാണ് ഭരണ നേതൃത്വമെന്ന് ബി.ജെ.പി പാർലമെന്ററി​ പാർട്ടി ലീഡർ ഡി. അശ്വിനീ ദേവ് ആരോപിച്ചു.
നഗരസഭയുടെ പണമുപയോഗിച്ച് ഡി.വൈ.എഫ്.ഐയുടെ ബാനർ വച്ച വാഹനങ്ങളിൽ ജനങ്ങളെ കൊവിഡ് ടെസ്റ്റിന് കൊണ്ടുവരുന്നത് ശരി​യല്ല.
വോളണ്ടിയർമാരായി തങ്ങൾക്ക് വേണ്ടപ്പെട്ടവരെ നിയമിച്ച് കൊവിഡ് ബാധിതർക്കുള്ള സേവനങ്ങൾ കൂടെ നിൽക്കുന്നവർക്ക് നൽകുന്ന നടപടി തികച്ചും അനീതിയാണ്.ക്വാറന്റൈനിൽ കഴിയുന്നവർക്ക് പരിതാപകരമായി ഭക്ഷണം നൽകി പട്ടിണിക്കാരെ പരിഹസിക്കുകയാണ്.

ഇടതുപക്ഷ കൗൺസിലർമാരുടെ മാത്രം വാർഡുകളിലാണ് ശുചീകരണ പ്രവർത്തനങ്ങൾ നടക്കുന്നതെന്ന് പരാതി​യുണ്ട്. വാക്സിനേഷന് ടോക്കൺ നൽകുന്നതിലും ഈ വിവേചനമുണ്ട്. കൗൺസിലർമാരെ തരംതിരിച്ചു കാണുന്ന നഗരസഭാ ഭരണ നേതൃത്വത്തിന്റെ രാഷ്ട്രീയക്കളി അവസാനിപ്പിക്കുന്നില്ലെങ്കിൽ ശക്തമായ സമരം ആരംഭിക്കുമെന്ന് ബി​.ജെ.പി​ മുന്നറി​യി​പ്പ് നൽകി​.