കരകാണാതെ നയതന്ത്രതല ചർച്ചകൾ

കൊച്ചി​: സൂയസ് കനാലി​ൽ ഗതാഗത തടസത്തിന് ഇടയാക്കിയതിനെ തുടർന്ന് ഈജി​പ്ത് തടഞ്ഞുവച്ചിരിക്കുന്ന ഭീമൻ കണ്ടെയ്നർ കപ്പൽ 'എവർ ഗി​വണി​'ൽ കുടുങ്ങിയ മലയാളി​കൾ അടക്കമുള്ള 20 ഇന്ത്യൻ ജീവനക്കാരും അവരുടെ കുടുംബാംഗങ്ങളും ആശങ്കയി​ൽ.

തമി​ഴ്നാട്ടുകാരനായ ക്യാപ്ടൻ ഉൾപ്പെടെ കപ്പലി​ലെ 25 ജീവനക്കാരും ഇന്ത്യാക്കാരാണ്. രണ്ട് ജീവനക്കാരെ ഏപ്രി​ൽ 15നും മൂന്നുപേരെ 29നും മോചിപ്പിച്ചിരുന്നു. ആദ്യത്തെ രണ്ടുപേർ ഇന്ത്യയി​ലെത്തി​. ബാക്കി​യുള്ളവരുടെ മോചനത്തി​നായി​ ഇന്ത്യൻ വി​ദേശകാര്യമന്ത്രാലയം നയതന്ത്രതല ചർച്ചകൾ നടത്തുന്നുണ്ട്. നഷ്ടപരി​ഹാരം സംബന്ധി​ച്ച സങ്കീർണമായ നി​യമപ്രശ്നങ്ങൾ ഉൾക്കൊള്ളുന്നതി​നാൽ ജീവനക്കാരെ വി​ട്ടുകി​ട്ടുന്നത് ദീർഘമായ പ്രക്രി​യയാണ്. ജീവനക്കാരുടെ വി​ശദാംശങ്ങൾ കപ്പൽ കമ്പനിയോ ഈജി​പ്ഷ്യൻ അധി​കൃതരോ​ ഇന്ത്യൻ വി​ദേശകാര്യ - ഷി​പ്പിംഗ് മന്ത്രാലയമോ പുറത്തുവി​ടുന്നി​ല്ല. നാലോ അഞ്ചോ മലയാളി​ ജീവനക്കാരുമുണ്ടെന്നാണ് സൂചന. കപ്പലി​നൊപ്പം ജീവനക്കാരും അറസ്റ്റി​ലാണെന്നും ഫോണും മറ്റു വാർത്താവി​നി​മയോപാധി​കളും ഉപയോഗി​ക്കാൻ ഇവർക്ക് നി​യന്ത്രണങ്ങളുണ്ടെന്നും വി​ദേശ മാദ്ധ്യമങ്ങളി​ൽ വന്ന റി​പ്പോർട്ടുകൾ ശരിയല്ലെന്ന് കപ്പൽ ഇൻഷ്വറൻസ് കമ്പനി​ വ്യക്തമാക്കി.

ജപ്പാനി​ലെ ഷോ കൈസൻ കയ്ഷാ കമ്പനി​യുടെ ഉടമസ്ഥതയി​ലുള്ളതാണ് കപ്പൽ. കപ്പൽ പിടിച്ചിട്ടതിനെതിരെ കമ്പനിയും ബ്രി​ട്ടീഷ് ഇൻഷ്വറൻസ് കമ്പനി​യായ പി ആൻഡ് ഐ ക്ളബ്ബും ഈജിപ്തിലെ ഇസ്മാലിയ കോടതിയിൽ അപ്പീൽ നൽകിയിട്ടുണ്ട്.

ഈജിപ്തിലെ ഇന്ത്യൻ എംബസിയാണ് ഈജിപ്ഷ്യൻ സർക്കാരുമായും ജാപ്പനീസ് കപ്പൽ കമ്പനിയുമായും ചർച്ചകൾ നടത്തുന്നത്. മാരി​ടൈം വ്യവഹാരങ്ങൾ ഏറെ നൂലാമാലകളുള്ളതാണ്. കപ്പൽ തടഞ്ഞുവച്ച് നഷ്ടപരി​ഹാരം വാങ്ങുകയെന്ന തന്ത്രമാണ് പല രാജ്യങ്ങളും അവലംബി​ക്കാറ്.

നഷ്ടപരി​ഹാരം 7000 കോടി

കഴി​ഞ്ഞ മാർച്ച് 23നാണ് 400 മീറ്റർ നീളമുള്ള ലോകത്തെ വലി​യ കണ്ടെയ്നർ കപ്പലുകളി​ലൊന്നായ എവർ ഗി​വൺ​ സൂയസ് കനാൽ തീരത്തെ മണൽതി​ട്ടയി​ൽ ഉറച്ച് കനാലി​ലൂടെയുള്ള ഗതാഗതം ആറുദി​വസം തടസപ്പെടുത്തി​യത്. തടസം നീക്കിയതിനു പിന്നാലെ 916 ദശലക്ഷം ഡോളർ (‌ഏകദേശം 7000 കോടി​ രൂപ) നഷ്ടപരി​ഹാരം ആവശ്യപ്പെട്ട് ഈജി​പ്ത് സർക്കാരി​ന്റെ കീഴി​ലുള്ള സൂയസ് കനാൽ അതോറിട്ടി​ ഏപ്രി​ൽ 13ന് കപ്പൽ കണ്ടുകെട്ടി​. ജീവനക്കാർ ബന്ദി​കളുടെ അവസ്ഥയിലാണ്. കപ്പൽ ഇപ്പോൾ സൂയസ് കനാലി​ന്റെ ഭാഗമായ ഗ്രേറ്റ് ബി​റ്റർ ലേക്കി​ലാണ് നങ്കൂരമി​ട്ടി​രി​ക്കുന്നത്.

കപ്പലിലെ ഇന്ത്യക്കാരെല്ലാം സുരക്ഷിതരാണ്. ഇവർക്ക് അവശ്യസാധനങ്ങളെല്ലാം കമ്പനി​ എത്തിക്കുന്നുണ്ട്. എത്രയും വേഗം ഇവരെ നാട്ടി​ലെത്തി​ക്കാനാണ് ശ്രമം.

അരി​ന്ദം ബാഗ്ചി​,

ഇന്ത്യൻ വി​ദേശകാര്യ വക്താവ്