കൊച്ചി: കൊവിഡ് വ്യാപനം രൂക്ഷമാകുന്ന സാഹചര്യത്തിൽ സ്വകാര്യ ആശുപത്രികളിൽ രണ്ടാം ഡോസ് വാക്‌സിൻ വിതരണം ഉടൻ ആരംഭിക്കണമെന്ന് മുൻമന്ത്രിയും തൃപ്പൂണിത്തുറയിലെ നിയുക്ത എം.എൽ.എയുമായ കെ. ബാബു ആവശ്യപ്പെട്ടു.

ജനങ്ങൾക്ക് വാക്‌സിനേഷൻ നൽകുന്നതിന്റെ ആദ്യഘട്ടത്തിൽ സ്വകാര്യ ആശുപത്രികളിൽ സർക്കാർ തന്നെ നേരിട്ട് വാക്‌സിൻ വിതരണം നടത്തി. സ്വകാര്യ ആശുപത്രികളിൽനിന്ന് ആദ്യഡോസ് വാക്‌സിൻ സ്വീകരിച്ചവർക്ക് 42 മുതൽ 56 ദിവസം കഴിഞ്ഞിട്ടും രണ്ടാം ഡോസ് സ്വീകരിക്കാൻ കഴിയുന്നില്ല. സ്വകാര്യ ആശുപത്രികൾക്ക് സർക്കാർ വാക്‌സിൻ വിതരണം നിറുത്തിയതാണ് കാരണം. ഇതു സംബന്ധിച്ച് മുഖമന്ത്രി, ആരോഗ്യമന്ത്രി എന്നിവർക്ക് കെ. ബാബു നിവേദനം നൽകി.