കളമശേരി: കുസാറ്റ് കാമ്പസിലെ സ്റ്റേറ്റ് ബാങ്ക് ഓഫ് ഇന്ത്യയുടെ എ.ടി.എം. മെഷീൻ പെട്രോൾ ഒഴിച്ച് കത്തിച്ച് പണം തട്ടാൻ ശ്രമിച്ച കേസിൽ പൂഞ്ഞാർ കല്ലിടയിൽ സുബിൻ സുകുമാരനെ (31) പൊലീസ് അറസ്റ്റ് ചെയ്തു. ഇന്നലെ രാവിലെ എറണാകുളം നോർത്ത് പൊലീസ് പെട്രോളിംഗ് നടത്തവേ കലൂർ ബസ് സ്റ്റാൻഡ് പരിസരത്ത് സംശയകരമായ സാഹചര്യത്തിൽ കണ്ട് ചോദ്യം ചെയ്യുകയും കൈക്ക് പൊള്ളലേറ്റ പാട് കണ്ട് സംശയം തോന്നി കസ്റ്റഡിയിലെടുക്കുകയുമായിരുന്നു. പ്രതിയെ കളമശേരി പൊലീസിന് കൈമാറി തെളിവെടുപ്പ് നടത്തി .

കാമ്പസിൽ കരാറടിസ്ഥാനത്തിൽ സുരക്ഷാ ജീവനക്കാരനായിരുന്ന സുബിനെ ജോലിയിൽ നിന്ന് പിരിച്ചുവിട്ടതിലെ വൈരാഗ്യമാണ് തീയിടാൻ കാരണമെന്ന് പൊലീസ് പറഞ്ഞു. 2018 ൽ ഗുരുവായൂരമ്പലത്തിൽ ബോംബ് വച്ചിട്ടുണ്ടെന്ന് വ്യാജ പ്രചാരണം നടത്തിയതിന് അറസ്റ്റിലായ പ്രതിയെ ജാമ്യത്തിലെടുക്കാൻ ആരും തയ്യാറാകാതിരുന്നതിനാൽ അടുത്ത കാലത്താണ് പുറത്തിറങ്ങിയത്.