കോലഞ്ചേരി: ലോക്ക് ഡൗണിലും ഓടുന്നു കെ.എസ്.ആർ.ടി.സിയുടെ ബോണ്ട് സർവീസ്. ഇക്കാലത്ത് പൊതുഗതാഗതമില്ലെങ്കിലും ഹൈറേഞ്ചിൽനിന്ന് ലോറേഞ്ചുവരെ ഈ ആനവണ്ടിയോടും. അതും മുടക്കമില്ലാതെ. അവശ്യ സർവീസിൽ ജോലിചെയ്യുന്നവർക്കും കൊവിഡ് പ്രതിരോധ പ്രവർത്തനങ്ങളിൽ നിൽക്കുന്ന ജീവനക്കാർക്കുമുൾപ്പെടെ ആശ്വാസമാണ് ഈ വണ്ടി.

 യാത്ര തിരിച്ചറിയൽ കാർഡ് കാണിച്ച്

തൊടുപുഴ കെ.എസ്.ആർ.ടി.സി ഡിപ്പോയിൽനിന്ന് രാവിലെ 8.20 ന് പുറപ്പെട്ട് 9.55ന് കാക്കനാട് സിവിൽ സ്റ്റേഷനിൽ എത്തുന്ന വിധമാണ് സർവീസ്. തിരികെ വൈകിട്ട് 5.05ന് കാക്കനാടുനിന്ന് പുറപ്പെട്ട് 6.30ന് തൊടുപുഴയിൽ എത്തിച്ചേരും. വാഴക്കുളം, മൂവാ​റ്റുപുഴ, കോലഞ്ചേരി, പുത്തൻകുരിശ്, വടവുകോട്, കാണിനാട്, കരിമുകൾ, ബ്രഹ്മപുരം, ഇൻഫോപാർക്ക് വഴിയാണ് ഓട്ടം. ഈ റൂട്ടിലുള്ള സർക്കാർ, സ്വകാര്യ സ്ഥാപനങ്ങളിലെ ജീവനക്കാർക്ക് തിരിച്ചറിയൽ കാർഡ് കാണിച്ച് ബസിൽ കയറാം.

പ്രത്യേകതകൾ

 കൊവിഡ് പ്രോട്ടോകോൾ പാലിച്ച് സർവീസ്

 രണ്ട് ഡോറുകളിലും സാനി​റ്റൈസർ

 എല്ലാവർക്കും ഉറപ്പായ സീ​റ്റുകൾ

 ഓട്ടോമാ​റ്റിക് ഡോർ സംവിധാനം

 നിലവിലുള്ള ബസ് സ്​റ്റോപ്പുകളുമായി ബന്ധമില്ല

 യാത്രക്കാർ ആവശ്യപ്പെടുന്നതാണ് സ്​റ്റോപ്പ്

 റൂട്ടിൽ എവിടെ നിന്നും കയറാം, ഇറങ്ങാം

 ബസ് വൃത്തിയാക്കി സാനി​റ്റൈസ് ചെയ്യുന്നു

 റിലാക്‌സേഷനായി മ്യൂസിക് സിസ്​റ്റം.

 ഒരിക്കലും മുടക്കമില്ലാത്ത സർവീസ്

 കാർഡ് എടുത്തോ ടിക്ക​റ്റ് എടുത്തോ യാത്രചെയ്യാം

 ബസിൽത്തന്നെ കാർഡ് വാങ്ങാൻ സൗകര്യം