ആലുവ: ഫെഡറൽ ബാങ്കിന്റെ നേതൃത്വത്തിൽ ആലുവ ജില്ലാ ആശുപത്രിയിൽ കൊവിഡ് രോഗികൾക്കായി 3.55 കോടി രൂപ ചെലവഴിച്ച് പ്രത്യേക ഐ.സി.യു ഒരുക്കും. വെന്റിലേറ്ററും മറ്റ് ആധുനിക ചികിത്സാ സംവിധാനങ്ങളോടും കൂടിയ 100 കിടക്കകളാണ് ഒരുക്കുന്നത്. ദേശീയ ആരോഗ്യമിഷനുമായി ചേർന്നാണ് കേന്ദ്രം സജ്ജമാക്കുന്നത്. ജില്ലയിൽ കൊവിഡ് കേസുകൾ വൻതോതിൽ വർദ്ധിച്ച സാഹചര്യത്തിൽ ഉടൻ പ്രവർത്തനസജ്ജമാക്കും.

ഫെഡറൽ ബാങ്കിന്റെ സാമൂഹിക ഉത്തരവാദിത്വ പദ്ധതികൾക്ക് മേൽനോട്ടം നൽകുന്ന ഫെഡറൽ ബാങ്ക് ഹോർമിസ് മെമ്മോറിയൽ ഫൗണ്ടേഷന്റെ നേതൃത്വത്തിലാണ് പദ്ധതി. കൊവിഡ് രണ്ടാംതരംഗം നേരിടുന്നതിന് വിവിധ സഹായങ്ങളും സൗകര്യങ്ങളും ഫെഡറൽബാങ്ക് കേരളത്തിലും രാജ്യത്ത് മറ്റിടങ്ങളിലും നടപ്പാക്കുന്നുണ്ട്. 10,000 വാക്‌സിൻ കാരിയർ യൂണിറ്റുകൾ സംസ്ഥാനസർക്കാരിനുവേണ്ടി ബാങ്ക് നൽകുന്നുണ്ട്.

മലപ്പുറം ജില്ലയിൽ മുതിർന്ന പൗരന്മാർക്കായി മൂന്ന് മൊബൈൽ വാക്‌സിനേഷൻ യൂണിറ്റുകൾക്കുള്ള സഹായവും നൽകിയിട്ടുണ്ട്. രാജ്യത്ത് കോവിഡ് ഏറ്റവും രൂക്ഷമായി ബാധിച്ച അഞ്ച് ജില്ലകളിൽ പ്രമുഖ ആശുപത്രിയുമായി ചേർന്ന് വാക്‌സിനേഷൻ പദ്ധതിയും നടപ്പാക്കുന്നുണ്ട്.