പറവൂർ: ചാത്തനാട് – വലിയകടമക്കുടി പാലത്തിന് ഭൂമി എറ്റെടുക്കുന്നതിനുള്ള അന്തിമ വിജ്ഞ്യാപനമായ 19(1) നോട്ടിഫിക്കേഷൻ പുറപ്പെടുവിച്ചതായി നിയുക്ത എം.എൽ.എ വി.ഡി. സതീശൻ അറിയിച്ചു. ഇതനുസരിച്ച് പാലത്തിന്റെ അപ്പ്രോച്ച് റോഡിന് ഏറ്റെടുക്കുന്ന സ്ഥലത്തിന് സർക്കാർ നിശ്ചയിച്ച പൊന്നുംവില പ്രകാരമുള്ള തുക ലഭിക്കും. എഴിക്കര പഞ്ചായത്തിലേയും കടമക്കുടി പഞ്ചായത്തിലേയും വീടും സ്ഥലവും നഷ്ടപ്പെടുന്നവർക്ക് പുനരധിവാസ പാക്കേജ് കഴിഞ്ഞ ജനുവരിയിൽ പ്രസിദ്ധീകരിച്ചിരുന്നു. വീട് നഷ്ടപ്പെടുന്നവർക്കുള്ള പുനരധിവാസത്തിനുള്ള പകരം സ്ഥലവും ഇതോടൊപ്പം നൽകും. നിശ്ചയിക്കപ്പെട്ട വില നൽകി ഒരുമാസത്തിനുള്ളിൽ സ്ഥലം ഏറ്റെടുക്കൽ നടപടികൾ പൂർത്തിയാക്കുമെന്നും പാലത്തിന്റെ ബാക്കി നിർമ്മാണ പ്രവൃത്തികൾ ഉടൻ ആരംഭിക്കുമെന്നും വി.ഡി. സതീശൻ അറിയിച്ചു.