കൊച്ചി: മലബാർ, എറണാകുളം മേഖലയിൽ മിൽമ ഇന്നുമുതൽ പാൽ സംഭരണം വെട്ടിച്ചുരുക്കും. ലോക്ക്‌ഡൗൺ​ മൂലം സംഭരണവും വി​തരണവും പ്രതി​സന്ധി​യി​ലായതാണ് കാരണം. മലബാറി​ൽ 40 ശതമാനവും എറണാകുളത്ത് 20 ശതമാനവുമാണ് കുറവുവരുത്തുക. തിരുവനന്തപുരത്ത് ഇന്നും നാളെയുമുള്ള വില്പന പരിശോധിച്ച് തീരുമാനമെടുക്കും.

മലബാറി​ൽ 1,122 സഹകരണസംഘങ്ങൾവഴി പ്രതിദിനം 8ലക്ഷംലിറ്റർ പാലാണ് മി​ൽമ സംഭരിക്കുന്നത്. ഇന്നുമുതൽ അത് 4.8 ലക്ഷമായി കുറയും. എറണാകുളം ഡെയറിയിൽ 879 സംഘങ്ങൾവഴി 4.5 ലക്ഷംലിറ്റർ എന്ന പ്രതിദിന സംഭരണത്തിൽ 90,000 ലിറ്റർ കുറവുവരുത്തും.

കണ്ണൂർ, മലപ്പുറം, വയനാട്, കോഴിക്കോട്, പാലക്കാട്, എറണാകുളം, തൃശൂർ, ഇടുക്കി, കോട്ടയം ജില്ലകളിലെ ലക്ഷക്കണക്കിന് ക്ഷീരകർഷകരെയാണ് ഈ തീരുമാനം പ്രതികൂലമായി ബാധിക്കുന്നത്. രാവിലെയും വൈകിട്ടും സംഘങ്ങളിൽനിന്ന് ശേഖരിക്കുന്ന പാൽ തൊട്ടടുത്തുള്ള ചില്ലിംഗ്പ്ലാന്റിൽ എത്തിച്ച് സംസ്കരിച്ച് വിപണിയിലെത്തിക്കുക എന്നത് 24 മണിക്കൂറും ഇടതടവില്ലാതെ നടക്കുന്ന പ്രവൃത്തിയാണ്. ട്രിപ്പിൾ ലോക്ക്‌ഡൗണുള്ള 4 ജില്ലകളിൽ രണ്ടും മലബാർ ഡെയറിയുടെ പരിധിയിലാണ്.

തിരുവനന്തപുരം ജില്ലയിൽ 199 ഇടറോഡുകൾ അടച്ച സാഹചര്യത്തിൽ പാൽവിതരണവാഹനങ്ങൾക്ക് കടന്നുപോകാൻ സാധിക്കുന്നില്ല. ഇന്നുമുതൽ ഏജന്റുമാർ ഓർഡർ കുറച്ചിട്ടുണ്ട്. ഈ സ്ഥിതി തുടർന്നാൽ ഇവിടെയും സംഭരണം വെട്ടിച്ചുരുക്കേണ്ടിവരും. തിരുവനന്തപുരം, പത്തനംതിട്ട, കൊല്ലം, ആലപ്പുഴ ജില്ലകളിലായി 668 പാൽ സംഭരണ സൊസൈറ്റികളും 4289 വിതരണ ഏജൻസികളുമുണ്ട്.

' ട്രിപ്പിൾ ലോക്ക്‌ഡൗൺ മേഖലയിൽ ഉൾപ്പെടെ മിൽക്ക് ബൂത്തുകൾ പ്രവർത്തിക്കാൻ അനുവദിക്കണം. പാൽ വിതരണത്തിന് നിയന്ത്രണങ്ങളിൽ ഇളവുണ്ടെങ്കിലും വാഹനഗതാഗതം തടസപ്പെടുത്തിയാൽ വിതരണം സാദ്ധ്യമാകില്ല.'

ജോൺ തെരുവത്ത്, ചെയർമാൻ എറണാകുളം മേഖല