പ്രതികൾ റിമാൻഡിൽ
കൊച്ചി: ദുബായിൽ നഴ്‌സ് ജോലി വാഗ്ദാനം ചെയ്ത് നിരവധിപേരെ കബളിപ്പിച്ച് കോടികൾ തട്ടിയെടുത്ത കലൂരിലെ 'ടെയ്ക് ഓഫ്' റിക്രൂട്ടിംഗ് ഏജൻസി ഉടമ എറണാകുളം നെട്ടൂർ കളരിക്കൽ വീട്ടിൽ ഫിറോസ് ഖാൻ(42) പണമത്രയും ഉപയോഗിച്ചത് ആഡംബര വാഹനങ്ങൾ വാങ്ങാൻ. നിരവധി വിസ തട്ടിപ്പ് കേസുകളിൽ പ്രതിയായ ഫിറോസിന് സെക്കൻഡ്‌ഹാൻഡ് ആഡംബര വാഹനങ്ങൾ വാങ്ങി മറിച്ച് വിൽക്കുന്ന ഇടപാടുമുണ്ട്. വാഹനങ്ങൾ കണ്ടെത്താൻ അന്വേഷണം ആരംഭിച്ചിട്ടുണ്ട്. രണ്ടര മുതൽ മൂന്നു ലക്ഷം രൂപ വരെയാണ് ഓരോ ഉദ്യോഗാ‌ർത്ഥിയിൽ നിന്നും കൈക്കലാക്കിയത്. ആകെ 2.35 കോടി രൂപ ഇയാൾ തട്ടിയെടുത്തതായാണ് പൊലീസിന്റെ കണക്ക്.
കഴിഞ്ഞ ദിവസം പൊലീസ് കസ്റ്റഡിയിലെടുത്ത ഫിറോസിന്റെയും ഇയാളുടെ ദുബായിയിലെ ഏജന്റ് ചേർത്തല അരൂക്കുറ്റി കൊമ്പനാമുറി പള്ളിക്കൽ വീട്ടിൽ സത്താറിന്റെയും (50) അറസ്റ്റ് രേഖപ്പെടുത്തി. പിടിയിലായ കൊല്ലം സ്വദേശിയുടെ അറസ്റ്റ് രേഖപ്പെടുത്തിയിട്ടില്ല. പ്രതികളെ സ്ഥാപനത്തിലെത്തിച്ച് തെളിവെടുത്തു. ഇവിടെ നിന്ന് നോട്ടെണ്ണുന്ന മെഷീനടക്കം പിടിച്ചെടുത്തതായാണ് വിവരം. പ്രതികളുടെ ദുബായിലുള്ള കൂട്ടാളികളെ നാട്ടിലെത്തിക്കാൻ പൊലീസ് നടപടി ആരംഭിച്ചിട്ടുണ്ട്. പ്രതികളെ റിമാൻഡ് ചെയ്തു.
സ്ഥിരംജോലി വാഗ്ദാനംചെയ്ത് വിസിറ്റിംഗ് വിസയിൽ ദുബായിലെത്തി രണ്ടുമാസം കഴിഞ്ഞും ജോലി ലഭിക്കാത്ത നഴ്‌സുമാർ മുഖ്യമന്ത്രിക്ക് നൽകിയ പരാതിയിലാണ് ഫിറോസ് കുടുങ്ങിയത്. ന്യൂഡൽഹിയിലേക്ക് കടക്കാനുള്ള ശ്രമത്തിനിടെയാണ് ഫിറോസിനെ കോഴിക്കോട് നിന്ന് പിടികൂടിയത്. വിദേശത്ത് ജോലി വാഗ്ദാനം ചെയ്ത് വഞ്ചിച്ചതിന് ഫിറോസ് ഖാനെതിരെ നോർത്ത് പൊലീസ് മുമ്പും കേസെടുത്തിരുന്നു. ഈ കേസിൽ ജാമ്യത്തിൽ ഇറങ്ങി സ്ഥാപനത്തിന്റെ പേര് മാറ്റി വീണ്ടും തട്ടിപ്പ് തുടരുകയായിരുന്നു.
ഒരാഴ്ചയ്ക്കുള്ളിൽ ജോലി, ഒന്നരലക്ഷം രൂപ പ്രതിമാസ ശമ്പളം, സൗജന്യ താമസം, ഭക്ഷണം തുടങ്ങിയവയായിരുന്നു വാഗ്ദാനങ്ങൾ. 500 പേരോളം തട്ടിപ്പിന് ഇരയായിട്ടുണ്ടെന്നാണ് പരാതിയിൽ പറയുന്നത്.കൊവിഡ് വാക്‌സിൻ നൽകുന്ന ജോലിയെന്ന പേരിൽ നഴ്‌സുമാരെ ആവശ്യമുണ്ടെന്ന് പരസ്യം നൽകിയാണ് ഉദ്യോഗാർത്ഥികളെ കുടുക്കിയത്. ദുബായിൽ എത്തിയ നഴ്‌സുമാരോട് ഹോം കെയറിലോ മസാജ് സെന്ററിലോ ജോലി ചെയ്യാൻ നിർബന്ധിച്ചു. മതിയായ ഭക്ഷണവും താമസ സൗകര്യവും നൽകിയുമില്ല. സർട്ടിഫിക്കറ്റുകൾ ഏജൻസിയുടെ ആളുകളുടെ കൈയിൽ അകപ്പെട്ടു. ഇങ്ങനെയാണ് വഞ്ചിക്കപ്പെട്ടെന്ന പരാതിയുമായി നഴ്‌സുമാർ രംഗത്തെത്തിയത്. ദുരിതത്തിലായ നഴ്‌സുമാരെ സഹായിക്കാൻ നിരവധി ആശുപത്രികൾ രംഗത്ത് എത്തിയിട്ടുണ്ട്.