കോലഞ്ചേരി: കെ.എസ്.ഇ.ബി പുതുപ്പനം 66 കെ.വി സബ്‌ സ്റ്റേഷനുചു​റ്റും കാടുകയറിയത് ഭീതിപരത്തുന്നു. സമീപത്തെ വീടുകളിലേക്കുള്ള വൈദ്യുത ലൈനിലേക്ക് സബ്‌സ്​റ്റേഷനുള്ളിലെ പുല്ലാന്തി വള്ളികൾ പടർന്നുകയറിയിട്ടുണ്ട്. സബ്‌സ്റ്റേഷന്റെ മതിൽ കാടു കയറിയും വള്ളികൾ വളർന്നും ഇടിഞ്ഞു വീഴാറായ അവസ്ഥയിലാണ്. സബ്‌ സ്റ്റേഷനുള്ളിൽ ഓഫീസിരിക്കുന്ന ഇടമൊഴികെ ബാക്കിയുള്ള സ്ഥലമത്രയും കാടുകയറിയ അവസ്ഥയാണ്. അഞ്ചേക്കറോളം വരുന്ന സ്ഥലത്തിന്റെ രണ്ടേക്കറോളം മാത്രമാണ് ഉപയോഗത്തിലുള്ളത്. ബാക്കി പ്രദേശമാണ് കാടുകയറിക്കിടക്കുന്നത്. ഏ​റ്റവും കൂടുതൽ കരുതൽവേണ്ട സബ്‌സ്റ്റേഷൻ യന്ത്റങ്ങൾ ഇരിക്കുന്നിടത്താണ് കാടുവളരുന്നത്.

കോലഞ്ചേരിയിലുള്ള കെ.എസ്.ഇ.ബി.ഓഫീസ് നിലവിൽ വാടകക്കെട്ടിടത്തിലാണുള്ളത്. കാടുകയറി കിടക്കുന്ന സ്ഥലത്ത് കെട്ടിടം നിർമ്മിച്ചാൽ വൈദ്യുത ഓഫീസിന്റെ വാടകയും ലാഭിക്കാം. വലിയ മരങ്ങൾ ഒടിഞ്ഞുവീണ് അയൽവീടുകൾക്ക് കേടുപാടുണ്ടാകാൻ സാദ്ധ്യതയുണ്ടെന്ന്ചൂണ്ടിക്കാട്ടി നാട്ടുകാർ പരാതിയും നൽകിയിട്ടുണ്ട്.