തൃക്കാക്കര: ജില്ലയിലെ തദ്ദേശ സ്വയംഭരണ സ്ഥാപനങ്ങളിൽ ഏർപ്പെടുത്തിയ കണ്ടെയ്ന്മെന്റ് വ്യവസ്ഥകൾ പുന:പരിശോധിക്കാൻ ജില്ലാ ദുരന്തനിവാരണ അതോറിറ്റി യോഗം തീരുമാനിച്ചു. തദ്ദേശ സ്വയംഭരണ വിഭാഗം, പ്രദേശത്തെ പൊതുജനാരോഗ്യ വിഭാഗം എന്നിവരുമായി ചർച്ച ചെയ്ത് വ്യവസ്ഥകളിൽ ഇളവ് അനുവദിക്കും. അധ്യയന വർഷം ആരംഭിച്ച സാഹചര്യത്തിൽ വാർഡുതല സമിതികളിലും ഡി.സി.സികളിലും നിയോഗിക്കപ്പെട്ട അദ്ധ്യാപകർക്ക് ഇത്തരം ചുമതലകളിൽ നിന്ന് ഒഴിവാകുന്നതിന് തടസമില്ല. യോഗത്തിൽ ജില്ലാ പഞ്ചായത്ത് പ്രസിഡന്റ് ഉല്ലാസ് തോമസ്, ദുരന്ത നിവാരണ വിഭാഗം ഡെപ്യൂട്ടി കളക്ടർ എസ്. ഷാജഹാൻ, ജില്ലാ വികസന കമ്മിഷണർ അഫ്സാന പർവീൺ തുടങ്ങിയവർ പങ്കെടുത്തു.