മുട്ടം: മലങ്കര അണക്കെട്ടിൽ ജലനിരപ്പ് 41.49 മീറ്ററായി ഉയർന്നു. ഇതേ തുടർന്ന് രണ്ടാമത്തെ ഷട്ടർ 10 സെ. മീറ്റർ തുറന്നു. അണക്കെട്ടിൽ പരമാവധി സംഭരണ ശേഷി 42 മീറ്ററാണ്. മൂലമറ്റം വൈദ്യുതി നിലയത്തിൽ ഉത്പാദനം വർദ്ധിച്ചതിനെ തുടർന്നാണ് മലങ്കരയിൽ ജലനിരപ്പ് ഉയർന്നത്. വേനൽ ശക്തമായതിനെ തുടർന്ന് കഴിഞ്ഞ രണ്ട് ദിവസങ്ങളായിട്ട് മൂലമറ്റം വൈദ്യുതി നിലയത്തിലെ 5 ജനറേറ്ററുകളും പൂർണ്ണമായും പ്രവർത്തിക്കുന്നുണ്ട്. മൂലമറ്റം വൈദ്യുതി നിലയത്തിലെ ഉത്പാദനത്തേയും സ്വാഭാവിക ഒഴുക്കിനേയും ആശ്രയിച്ചാണ് മലങ്കര അണക്കെട്ടിൽ പ്രധാനമായും വെള്ളത്തിന്റെ അളവ് കൂടുകയും കുറയുകയും ചെയ്യുന്നത്. കഴിഞ്ഞ ഏതാനും മാസങ്ങളായി അണക്കെട്ടിലെ ഒരു ഷട്ടർ 10 സെ. മീറ്റർ ഉയർത്തിയ അവസ്ഥയാണ് തുടരുന്നത്. മലങ്കര വൈദ്യുതി നിലയത്തിലെ ഉത്പാദനം 5.14 മെഗാ വാട്ട് വൈദ്യുതിയാണ്.