തൊടുപുഴ: ദിവസേന കൊവിഡ് രോഗികളുടെ എണ്ണം വർദ്ധിക്കുന്നതിനെ തുടർന്ന് ഇടവെട്ടി, ആലക്കോട് എന്നീ പഞ്ചായത്തുകളിൽ ഡൊമിസിലറി കൊവിഡ് കെയർ സെന്ററുകൾ (ഡിസിസി) തുറന്നു. രണ്ട് പഞ്ചായത്തിലും ഡിസിസി തുറക്കുന്നതിനാവശ്യമായ കെട്ടിടങ്ങൾ ഏറ്റെടുത്തുകൊണ്ട് ജില്ലാ കളക്ടർ ഉത്തരവിറക്കി. പ്രത്യക്ഷ രോഗലക്ഷണങ്ങളും കാര്യമായ ആരോഗ്യ പ്രശ്‌നങ്ങളും ഇല്ലാത്തതും വീടുകളിൽ ഐസൊലേഷനിൽ കഴിയാൻ വേണ്ടത്ര സൗകര്യമില്ലാത്തതുമായ രോഗികളെയാണ് ഡൊമിസിലറി കെയർ സെന്ററുകളിലേക്ക് മാറ്റുക.

ഇടവെട്ടിയിൽ ഇതുവരെ 6 മരണം

ജനസാന്ദ്രത ഏറിയതും വിസ്തീർണ്ണം കുറഞ്ഞതുമായ ഇടവെട്ടി പഞ്ചായത്തിൽ നിലവിൽ 332 രോഗികളാണുള്ളത്. കൊവിഡ് രോഗം ബാധിച്ച് ഇതുവരെ ഇടവെട്ടിയിൽ 6 പേരാണ് മരിച്ചത്. രോഗ പകർച്ച നിയന്ത്രിക്കുന്നതിന്റെ ഭാഗമായി ആകെയുള്ള 13 വാർഡിൽ 11 വാർഡ് നിലവിൽ കണ്ടെയ്ൻമെന്റ് സോൺ ആക്കിയിരിക്കുകയാണ്. രോഗനിയന്ത്രണത്തിന്റെ ഭാഗമായാണ് ഇടവെട്ടിയിൽ ഡൊമിസിലറി കോവിഡ് കെയർ സെന്ററുകൾ (ഡിസിസി) തുറക്കാൻ തീരുമാനിച്ചത്. കല്ലാനിക്കൽ സെന്റ് ജോർജ്ജ് സ്‌കൂൾ കെട്ടിടത്തിലാണ് ഡിസിസി പ്രവർത്തിക്കുക. ഇവിടത്തെ അടിസ്ഥാന സൗകര്യങ്ങൾ പൂർണ്ണമായും പഞ്ചായത്തിന്റെ നേതൃത്വത്തിൽ സജ്ജീകരിച്ചതായി പ്രസിഡന്റ് ഷീജാ നൗഷാദ് പറഞ്ഞു. 60 ബെഡാണ് രോഗികൾക്കായി തയ്യാറാക്കിയിരിക്കുന്നത്. സ്ത്രീകൾക്കും പുരുഷൻമാർക്കുമായി പ്രത്യേകം മുറികളുണ്ടാവും. 10 ബെഡുകളടങ്ങിയ വിവിധ മുറികളാണ് രോഗികൾക്കായി സജ്ജീകരിച്ചിരിക്കുന്നത്. മുറികളിൽ ലൈറ്റ്, ഫാൻ ഉൾപ്പെടെയുള്ളവ സജ്ജീകരിച്ചിട്ടുണ്ട്. സ്ത്രീകൾക്കും പുരുഷൻമാർക്കും പ്രത്യേകം ശുചിമുറികളുമിവിടെയുണ്ട്. രോഗം സ്ഥിരീകരിക്കുന്നവരെ ഡിസിസിയിലേക്ക് എത്തിക്കുന്നതിന് പ്രത്യേകം വാഹനവും ഏർപ്പെടുത്തിയിട്ടുണ്ട്. ഇവിടെ പ്രവേശിപ്പിക്കുന്നവർക്ക് പഞ്ചായത്തിന്റെ നേതൃത്വത്തിലാവും ഭക്ഷണം എത്തിച്ച് നൽകുക. പരിശീലനം നൽകിയ വോളന്റിയർമാരുടെ സേവനം 24 മണിക്കൂറും ഇവിടെ ലഭ്യമാക്കിയിട്ടുണ്ട്. തിങ്കളാഴ്ച മുതൽ ഇവിടേക്ക് രോഗികളെ പ്രവേശിപ്പിച്ച് തുടങ്ങും. കഴിഞ്ഞ വർഷം സിഎഫ്എൽറ്റിസി തുടങ്ങുന്നതിനായി സജ്ജീകരിച്ച കെട്ടിടമാണിത്. ആരോഗ്യ വകുപ്പ് ആവശ്യപ്പെടുന്ന പക്ഷം സിഎഫ്എൽറ്റിസി ക്കായി ഇത് വിട്ടുനൽകുമെന്നും പ്രസിഡന്റ് ഷീജാ നൗഷാദ് പറഞ്ഞു.

ആലക്കോട് പഞ്ചായത്തിൽ മൂന്ന് കെട്ടിടങ്ങൾ ഏറ്റെടുത്തു

ആലക്കോട് പഞ്ചായത്തിൽ നിലവിൽ 113 രോഗികളാണുള്ളത്. ഇവിടെ ഡിസിസി തുടങ്ങുന്നതിനായി മൂന്ന് കെട്ടിടങ്ങളാണ് ഏറ്റെടുത്തിരിക്കുന്നത്. പുരുഷൻമാർക്കായി അഞ്ചിരി സെന്റ്. മാർട്ടിൻ ഡി പോൾസ് ചർച്ച് പാരിഷ് ഹാൾ, സ്ത്രീകൾക്കായി പഞ്ചായത്ത് ഓഫീസിന് സമീപത്ത് തന്നെ രണ്ട് വീടുകൾ എന്നിവയാണ് ഏറ്റെടുത്തിരിക്കുന്നത്. 50 പുരുഷൻമാരെയും 20 സ്ത്രീകളെയും ഇവിടെ പ്രവേശിപ്പിക്കുന്നതിനുള്ള സജ്ജീകരണമാണ് ഏർപ്പെടുത്തുക. ഇതിനായുള്ള നടപടികൾ ആരംഭിച്ചതായി പഞ്ചായത്ത് പ്രസിഡന്റ് മിനി ജെറി പറഞ്ഞു. നിലവിൽ ഇഞ്ചിയാനി ഗവ. എൽപി സ്‌കൂളിൽ താൽക്കാലികമായി തയ്യാറാക്കിയ ഡിസിസി യിൽ അഞ്ച് രോഗികളെ പ്രവേശിപ്പിച്ചിട്ടുണ്ട്. പുതിയ കേന്ദ്രം സജ്ജീകരിക്കുന്നതോടെ ഇവരെ അവിടേക്ക് മാറ്റും. ആലക്കോട് പ്രാഥമിക ആരോഗ്യ കേന്ദ്രത്തിന്റെ സഹകരണവും ഡിസിസി യിലേക്ക് ഉറപ്പ് വരുത്തിയിട്ടുണ്ടെന്ന് പ്രസിഡന്റ് മിനി ജെറി അറിയിച്ചു.