കുമാരമംഗലം: പഞ്ചായത്തിൽ കൊവിഡ് രോഗികളുടെ എണ്ണം വർദ്ധിക്കുന്നതിനെ തുടർന്ന് പഞ്ചായത്ത് ഭരണ സമിതിയുടെ നേതൃത്വത്തിൽ ഡൊമിസിലറി കെയർ സെന്റർ (ഡി.സി.സി) പ്രവർത്തനം തുടങ്ങി. 211 കൊവിഡ് രോഗികളാണ് നിലവിൽ പഞ്ചായത്തിലുള്ളത്. ഇതിന് പുറമേ റിവേഴ്‌സ് ക്വാറന്റൈനിൽ 55 പേരും പ്രൈമറി കോണ്ടാക്ടായ 276 പേരും പഞ്ചായത്തിലുണ്ട്. കൊവിഡ് ബാധിച്ച് പഞ്ചായത്തിൽ ഇതുവരെ രണ്ട് പേരാണ് മരിച്ചത്. പഞ്ചായത്തിൽ ആകെ 13 വാർഡുകളുള്ളതിൽ മൂന്നെണ്ണം കണ്ടെയിൻമെന്റ് സോണാക്കിയിട്ടുണ്ട്. പ്രത്യക്ഷ രോഗലക്ഷണങ്ങളും കാര്യമായ ആരോഗ്യ പ്രശ്‌നങ്ങളും ഇല്ലാത്തതും വീടുകളിൽ ഐസൊലേഷനിൽ കഴിയാൻ വേണ്ടത്ര സൗകര്യമില്ലാത്തതുമായ രോഗികളെയാണ് ഡൊമിസിലറി കെയർ സെന്ററുകളിലേക്ക് മാറ്റുക. കുമാരമംഗലം പൈങ്കുളം സെന്റ് തോമസ് യു.പി സ്‌കൂളിലാണ് ഡി.സി.സി പ്രവർത്തിക്കുക. പുരുഷന്മാർക്കും സ്ത്രീകൾക്കുമായി 50 കിടക്കകളാണ് ഇവിടെ സജ്ജീകരിച്ചിട്ടുള്ളത്. രോഗം സ്ഥിരീകരിച്ചവരെ ഡി.സി.സിയിലേക്ക് എത്തിക്കുന്നതിനും ഗുരുതരാവസ്ഥയുണ്ടായാൽ ആശുപത്രിയിലേക്ക് കൊണ്ടുപോകുന്നതിനുമായി ഒരു ആംബുലൻസ് ഉൾപ്പെടെ മൂന്ന് വാഹനങ്ങൾ സജ്ജീകരിച്ചിട്ടുണ്ട്. ഡി.സി.സിയിൽ പ്രവേശിപ്പിക്കുന്ന രോഗികൾക്ക്പഞ്ചായത്തിന് കീഴിലെ ജനകീയ ഹോട്ടലിൽ നിന്ന് ഭക്ഷണം എത്തിച്ച് നൽകും. ഇതിനായി പഞ്ചായത്തിൽ രജിസ്റ്റർ ചെയ്ത വോളന്റിയർമാർ ഷിഫ്റ്റ് അടിസ്ഥാനത്തിൽ ഇവിടെ സേവനത്തിനുണ്ടാവും. പഞ്ചായത്തിന്റെ ഉത്തരവാദിത്വത്തിൽ ഒരു ഡോക്ടറുടെ സേവനം 24 മണിക്കൂറും ഡി.സി.സിയിൽ ഉണ്ടാവും. ഇതിന് പുറമേ കുമാരമംഗലം ഫാമിലി ഹെൽത്ത് സെന്ററിലെ ആരോഗ്യ പ്രവർത്തകരുടെ മേൽ നോട്ടം ഉറപ്പ് വരുത്തിയിട്ടുണ്ടെന്ന് പഞ്ചായത്ത് പ്രസിഡന്റ് ഷെമീന നാസർ പറഞ്ഞു.