തൊടുപുഴ: നിയോജക മണ്ഡലത്തിലെ വിവിധ പ്രദേശങ്ങളിൽ പ്രവർത്തിക്കുന്ന സാമൂഹിക അടുക്കളയിലേക്കും ജനകീയ ഹോട്ടലുകളിലേക്കുമായി പി.ജെ. ജോസഫ് എം.എൽ.എയുടെ ഡയറി ഫാമിൽ നിന്ന് വിതരണം ചെയ്യുന്നത് നിത്യേന 60 ലിറ്റർ പാൽ. എല്ലാ പഞ്ചായത്തുകളിലും പ്രവർത്തിക്കുന്ന സാമൂഹിക അടുക്കളയിലേക്ക് ഒന്നിടവിട്ട ദിവസങ്ങളിലാണ് പാൽ എത്തിക്കുന്നത്. എം.എൽ.എ ഹെൽപ്പ് ഡെസ്‌ക്കിന്റെ പ്രവർത്തനവും സജീവമായിട്ടുണ്ട്. മരുന്നു വിതരണം, കിറ്റ് വിതരണം, രക്തദാനം തുടങ്ങിയ പ്രവർത്തനങ്ങൾ കേരളാ കോൺഗ്രസ്, യൂത്ത് ഫ്രണ്ട് പ്രവർത്തകർ നടത്തുന്നുണ്ട്. ഗാന്ധിജി സ്റ്റഡി സെന്റർ വൈസ് ചെയർമാൻ അപു ജോൺ ജോസഫിന്റെ നേതൃത്വത്തിലാണ് വിവിധ സാമൂഹിക പ്രവർത്തനങ്ങൾ നടക്കുന്നത്. കൊവിഡ് രോഗ പ്രതിരോധ പ്രവർത്തനങ്ങളുടെ ഭാഗമായാണ് സാമൂഹിക അടുക്കളയിലും മറ്റും പാലും പച്ചക്കറികളും എത്തിക്കുന്നത്. എം.എൽ.എ ഹെൽപ്പ് ഡെസ്‌ക് മുഖാന്തിരം ചികിത്സാ സൗകര്യവും മരുന്നും ഉറപ്പുവരുത്തുന്നുണ്ട്.