ഇടുക്കി: ജില്ലയിൽ ടെസ്റ്റ് പോസിറ്റിവിറ്റി നിരക്ക് 20 ശതമാനത്തിൽ താഴെയെത്തിയതോടെ ലോക്ക്‌ ഡൗണുമായി ബന്ധപ്പെട്ട് ജില്ലാ ഭരണകൂടം ചെറിയ ഇളവുകൾ അനുവദിച്ചു. ഇതനുസരിച്ച് ജില്ലയിലെ വസ്ത്രവ്യാപാര, ജൂവലറി സ്ഥാപനങ്ങൾക്ക് വളരെ പരിമിതമായ ജീവനക്കാരെ വച്ച് ദിവസം ഒരു മണിക്കൂർ തുറന്നു പ്രവർത്തിക്കാം. എന്നാൽ നേരിട്ടു വില്പന പാടില്ല. ഹോം ഡെലിവറി, ഓൺലൈൻ ഡെലിവറി മാത്രമെ പാടുള്ളൂ. കല്യാണ പാർട്ടിക്കാർക്ക് ഒരു മണിക്കൂർ കടയിൽ ചിലവഴിക്കാൻ അനുവാദമുണ്ട്. ടാക്‌സ് കൺട്ടന്റ്, ജി.എസ്.ടി പ്രാക്ടീസ് സ്ഥാപനങ്ങൾക്ക് വ്യാഴം, വെള്ളി ദിവസങ്ങളിൽ തുറന്നു പ്രവർത്തിക്കാം. പൈനാപ്പിൾ കൃഷിയുമായി ബന്ധപ്പെട്ട ജോലികൾക്ക് അന്യ സംസ്ഥാന തൊഴിലാളികളെ ഉപയോഗിക്കാം. ടെലികോം ടവറുമായി ബന്ധപ്പെട്ട ജോലികൾ നടത്താം. മറ്റ് നിയന്ത്രണങ്ങൾ കർശനമായി തുടരുമെന്നും അനാവശ്യമായി പുറത്തിറങ്ങുന്നത് രോഗവ്യാപനം തടയുന്നത് മുൻനിറുത്തി ഒഴിവാക്കണമെന്നും ജില്ലാ കളക്ടർ ആവശ്യപ്പെട്ടു.